Siglir tar il cuntegn

Header

cuntegn

Surselva Sedrun vs. Mustér – carplina carina per oz ed adina

La Sibla, la gasetta da tschaiver, è cumparida. Per il motto da tschaiver da quest onn ha l’artist Antonino di Bella puspè creà la medaglia: Il cumbat tranter Mustér e Tujetsch sin ils cunfins da la duas vischnanca a Crestas.

Taur cunter capricorn u ils Tuatschins, che fissan pli gugent Uranais, cunter ils da Mustér: Quai è il motto dal tschaiver ed il tema principal da la Sibla en sia 31avla ediziun.

Si cun els

In dals gronds temas da la Sibla èn perquai ils scumbigls da Sedrun Mustér turissem SMT. Tujetsch na vul betg SMT e SMT na vul betg Mustér. Ed i dat in connex tranter SMT e la Corea, e perquai propona la Sibla da sajettar SMT sin la glina. Ils Tuatschins han dentant cletg, perquai ch’els han (tenor il caricaturist da la Sibla) in spendrader: «Böschlin il grond.»

La Sibla

Avrir la box Serrar la box

La Sibla cuntegn 20 paginas ed è vegnida stampada en 550 exemplars. L’editura è l’Uniun da tschaiver Mustér. La Sibla pon ins cumprar en las stizuns localas ubain online. Ella custa 8 francs.

Il president communal da Medel n’è betg stà involvì en quest scumbigls. Persuenter sto el forsa s’occupar d’in «misterius Talianer». Ed il dilemma dal caricaturist: Duai el scriver Peter ubain pader Binz?

I dà dentant anc autras perlas tematicas en la pli nova gasetta da tschaiver per Mustér e conturns.

Johnny Black is back

In auter tema che ha fatschentà ils da Mustér: Ils requirents d’asil. La persuna che haja fatg «guttas cun chau e procurà en in plum 75 novs vischins e vischinas per la vischnanca da Mustér» saja in «Johnny Black». Questa persuna ha manà pli baud il hotel Cucagna ed è stada 1998 il pli aut politicher grischun.

Sco ultim exempel Sumvitg : Da Sumvitg audian ins mo pauc ils ultims onns. Persuenter va la medaglia d’aur a Sumvitg, e quai per Sep Tecca (che dat teccas).

Artitgels legids il pli savens