L’iniziativa da sanar questa senda ha prendì Robert Kruker. El dovra sez savens quella senda tranter Dardin e Breil. Perquai ch’el è da l’opiniun ch’i saja donn sche questa via giaja en malura, ha el contactà la vischnanca e dumandà sch’ella veglia betg sanar questa via. La vischnanca è stada d’accord e Robert Kruker ha organisà ils daners persuenter. Sco el di custia la sanaziun rodund 160’000 francs. Quests daners vegnian da l’Uffizi per la natira e l'ambient dal Grischun, da l’Uffizi federal da vias, dal Fonds svizzer per la cuntrada ed autras instituziuns. Tenor il suprastant communal Roman Cathomas sto la vischnanca uschia betg prender sezza enta maun daners. Ella sto sulet far l’administraziun, metter a disposiziun ils lavurers da vischnanca ed organisar persunas che fan lavur cumina.
250 meters mirs sitgs èsi da sanar
Ina uniun che fa lavur cumina è la musica da tschaiver «Las Patlaunas». Tenor la presidenta Marianne Ventira fetschian els adina puspè lavur cumina ed ella n’haja betg miserias da far vegnir ils commembers a lavurar. Anzi sco quai che quels dian hajan els tschaffen da far insatge che resta, da pudair far insatge da cumpagnia e sa chapescha fetschia quai era bain a la cassa da l’uniun. Sco Roman Cathomas ha ditg vegnian autras uniuns medemamain a far lavur cumina ed era la protecziun civila haja gia gidà en in lieu. En tut èn quai var 250 meters mirs sitgs ch’igl è da sanar u far da nov. Sin il pli tard en trais onns duain las lavurs esser terminadas.
RR Total local 11:30