Malgrà las circumstanzas spezialas, cun Sep e Giulietta Cathomas vai bain, dian els.
En quel bel lieu che nus stain è quai in vair plaschair.
Betg mo «la bell'aura, la survista e las bunas circumstanzas da naiv» fan bain als dus seniors, er il contact cun lur famiglia. Ina da las figlias cun ses trais uffants e l’um abiteschan er a Breil. Giulietta Cathomas che ha 70 onns, cuschina savens gentar per ils uffants.
Il contact social sper ils trais uffants e tschintg biadis manca dentant fitg ad els. Cunzunt per il Chor baselgia da Breil lascha il pèrin activ encrescher.
Il chantar manca fitg.
Sa fatschentar d’autra moda
Uschia sa fatschentan ils dus seniors d’autra moda. Els taidlian savens radio, las istorgias che Pro Senectute ha realisà u han guardà la «Metta da fein». Chaussas che fetschian bain e plaschair, dian ils dus da Breil.
Pli digitals
L’entira situaziun haja era gì la consequenza che Giulietta e Sep Cathomas sajan vegnids pli digitals. Els scrivian uss dapli mails u messadis via WhatsApp. Ma els prendian era dapli temp per scriver brevs persunalas a maun.
Festa da Nadal
Co exact ch'il pèrin festivescha Nadal, n'è anc betg cler. La finamira è da festivar cun ils trais uffants e lur famiglias dapersai – ma quai n’è anc betg fixà.
Ir cun skis
Questa fin d’emna fan Giulietta e Sep Cathomas in ulteriur pass en direcziun normalitad. Lura vegnan numnadamain ils skis prendids ord tschaler.