Cun l’analisa radiocarbonica C14 san ins datar material organic vaira exact. Quella metoda garantescha da datar ossa da carstgauns. A Sagogn ha il Servetsch archeologic dal Grischun supponì la primavaira passada ch’ins saja fruntà sin in santeri dal temp medieval tempriv. Igl è l’epoca dal 5avel tschientaner s. Cr. fin 1000 s. Cr.
Quella dataziun sa verifitgescha ussa. Quatter da las 48 fossas han ins controllà cun la metoda C14. Diversas eran ina sur l’autra, en tut han ins pudì eruir 71 persunas. «Quatter fossas dateschan dals onns 435 fin 943 s. Cr.», ha Thomas Reitmaier, il manader dal Servetsch archeologic dal Grischun, communitgà venderdi passà a la populaziun da Sagogn. L’uniun Pro Sagogn aveva envidà ad ina saira cun l'archeolog chantunal.
L’interess per las pli novas enconuschientschas saja stà grond. Radund 100 persunas èn vegnidas a la saira d’infurmaziun en chasa da scola. Thomas Reitmaier è vegnì a Sagogn per schliar il lign. Ils skelets ch’ils archeologs han chattà, han els transportà a Basilea en l'Institut interchantunal d’antropologia. Il Servetsch archeologic ha laschà examinar quatter skelets cun la metoda C14. Il resultat èn represchentativs per l’entira chattada. «Igl è in santeri ch’è stà en funcziun a partir da l’antica tardiva fin il temp medieval tempriv.
L’interessant è ch’igl è in santeri da la populaziun cumina, betg da clericals, glieud nobla u da persunas da la politica», ha Thomas Reitmaier declerà. Grazia a l'exchavaziun han ins survegnì novas enconuschientschas da la colonisaziun tempriva da la regiun. L’examinaziun da quels defuncts cumprova ch’ils umens murivan en media en ina vegliadetgna da 45 onns e las dunnas da 43 onns. L’ossa da las 71 persunas ch’ils archeologs han prendì ord la terra a Sagogn, restan conservadas en l'institut antropologic interchantunal a Basilea.