Siglir tar il cuntegn

Header

cuntegn

Sessiun da giuventetgna Glion Giuvenils vulan in bogn cuvert, in Mc Donald's e dapli bus

La fin d'emna ha gì lieu per l'emprima giada la sessiun da giuventetgna en chasa da scola a Glion. Giuvens e giuvnas tranter 13-25 onns han pudì inoltrar lur giavischs a la suprastanza communala. Organisà quell'occurrenza ha la Cumissiun da giuventetgna Glion ch'i dat dapi l'october passà.

En pitschnas gruppas han ils 28 giuvenils elavurà lur giavischs tar ils temas mobilitad, lieu da s'entupada/vita nocturna e temp liber/infrastructura. Quels temas eran vegnì giavischà ordavant da las visitadras e dals visitaders a chaschun da la fiera da vinars la fin da december a Glion.

audio
Sessiun da giuventetgna preschenta las ideas e pretensiuns
ord Actualitad dals 24.04.2023. Maletg: Cumssiun da giuventetgna Glion
laschar ir. Durada: 4 minutas 59 Secundas.

Differents giavischs

Las giuvnas ed ils giuvens ch'èn tuts da la citad da Glion u da las fracziuns discurran davart ina halla da bouldrar, in local per far musica, star da cumpagnia e guardar fims dentant era in parc da skating, ina stizun ch'è averta 24 uras u in Mc Donald's. Agid da metter sin palpiri lur ideas survegnan els da commembers e commembras dal parlament da Glion. La finala po il president communal Marcus Beer era gest prender sez posiziun sin intginas da las propostas.

I dat l'economia privata ed i dat il stadi. La vischnanca na po betg simplamain avrir in Mc Donald's e far concurrenza cun l'economia privata.
Autur: Marcus Beer davart proposta d'in restaurant da fastfood

Ed era sch'ils giuvenils n'han tar lur propostas betg stuì guardar sin ils daners, sch'ina proposta vegn la finala prendida a mauns da la vischnanca ston era las finanzas constar, quai declera Marcus Beer pliras giadas als giuvenils. Tenor el è quella occurrenza era ina buna chaschun ch'ils giuvens e las giuvnas vesan ina giada co i è da far politica e sin tge ch'ins sto guardar tut.

Tschintg incumbensas a la politica

La fin dal di surdat Sarina Casanova, la presidenta da la Cumissiun da giuvenils Glion, tschintg incumbensas a la suprastanza communala:

  • In bus duess circular almain trais giadas per di en mintga fracziun
  • In «bus dal local da giuventetgna» duai charrar ils giuvenils a chasa en las fracziuns mintgamai il venderdi e la sonda saira suenter lur sortida en il local da giuventetgna a Glion.
  • Il local da giuventetgna sa chatta il mument ordaifer la citad a l'ur dal guaud. Igl è previsibel ch'i è da chattar ils proxims onns in nov lieu, cunquai ch'il nov lavuratori communal è planisà sin l'areal actual. Suenter discussiun intensiva en il plenum è vegnì decidì ch'i na dovria betg exnum in pli grond, mabain uschè spert sco pussibel in auter local per scolars e scolars da la vischnanca.
  • Proximamain duai in «pumptrack», in percurs da mountainbike vegnir realisà a Glion. Ils giuvenils vulessan gugent engrondir quella purschida cun in parc da skating.
  • In local da notg en in lieu central. La cundiziun la pli impurtanta è dentant ch'ins na dastga betg fimar en quest local. Sco il president communal ha declerà, saja da chattar l'emprim ina soluziun cun ils manaders e manadras dals locals da notgs existents.
audio
Gierina Gabriel e Sarina Casanova s'engaschan per la politica da Glion
ord Actualitad dals 24.04.2023. Maletg: RTR
laschar ir. Durada: 4 minutas 9 Secundas.

Las duas presidentas

L'idea d'organisar uschè ina sessiun da giuventetgna è vegnida da Sarina Casanova. La giuvna da 20 onns abitescha a Strada sper Glion ed è presidenta da la Cumissiun da giuvenils. Ensemen cun Gierina Gabriel, la presidenta dal parlament da Glion, ha ella manà tras il di. Davent dad ussa duai dar regularmain, mintga dus onns, ina sessiun da giuventetgna en vischnanca.

RTR actualitad 17:00

Artitgels legids il pli savens