Siglir tar il cuntegn

Header

cuntegn

Surselva Set punts a Danis-Tavanasa

Ina punt per il tren, ina punt per peduns e tschintg punts per autos. Il fotograf d'architectura Wilfried Dechau e l'uniun Nossa punt han edì in cudesch che tracta tut las punts che mainan sur il Rain Anteriur tranter Danis e Tavanasa.

Strusch da crair ch'i dat 7 punts, sin var 1,5 kilometers dal Rain Anteriur. La punt a la quala l'uniun Nossa Punt ha dà grond pais è quella da Versell, construida l'onn 1928. Ina punt per tut il trafic. L'onn 1927 era la punt veglia da Maillart vegnida destruida d'ina bova. En mo 10 mais han ins construì la nova, quella da Versell.

audio
Las set punts da Danis-Tavanasa
ord Total local dals 26.02.2018. Maletg: RTR, Linus Livers
laschar ir. Durada: 3 minutas 12 Secundas.

Questa stad vegn la punt restaurada inaugurada e surdada al traffic plaun; vul dir als peduns ed als velos. Quella punt gioga la rolla principala en il cudesch Nossa Punt. Ella è documentada cun pleds e fotografias da tuttas varts. Ed era la populaziun da Danis-Tavanasa vegn a pled. Sin pliras paginas raquintan giuven e vegl da lur punt.

Il cudesch ha anc in'autra atgnadad. El è scrit en trais linguatgs: rumantsch, tudestg ed englais. Mo uschia fetschia ina ediziun da 1'300 tocs d’in cudesch d’architectura senn, manegia la presidenta da l’uniun Nossa Punt Rita Cathomas Bearth.

Artitgels legids il pli savens