Lavurar fin d’emnas e la saira fin suenter mesanotg – quai tutga tar il mintgadi da Roel Schmed. Il giuven da 19 onns è cuschinier en il Waldhaus a Flem, en l’ustaria da gourmet «Epoca».
Il positiv è, che jau entschaiv savens pir a las 14:00 a lavurar e lura sai jau tuttina ir en sortida cun mes amis.
Ad el saja dentant gartegià bain da mantegnair il contact cun ils amis. Ma tuttina vivan ins in sper l’auter ora, di Roel Schmed. Uschia ch’ins haja lura savens adina dapli amis che lavuran era en la gastronomia.
33 dis senza in di liber
Ma betg mo ils amis pateschian, era ils hobis. Il cuschinier dat ballape tar l’US Danis-Tavanasa. Sia posiziun: gist là nua ch'ins dovra insatgi. El è numnadamain memia darar a trenaments e gieus per avair ina posiziun fixa.
Il temp cura che tuts fan vacanzas, è il pli strapatschus per ils cuschinunzs. Roel Schmed ha lavurà tranter ils 3 da december fin ils 4 da schaner senza in di pausa. «Lura hai num: morder sin ils dents e tegnair tras», di il giuven cun chavels lungs brins. Suenter vegnia er puspè ina fasa pli lucca.
La cuschina exteriura interessa Roel Schmed
In di vuless Roel Schmed ir en l’exteriur per emprender d’enconuscher la cuschina exteriura. Forsa si en il nord, ma era la cuschina mediterrana ed asiatica interessan el.
Ed era sch'ils temps da lavur irregulars na vegnan betg a sa midar, la lavur sco cuschinunz plascha al giuven da Breil fitg bain.
RTR actualitad 08:00