Dumengia marvegl en la «Casa Sentupada» a Siat: La gruppa da teater sa rimna per in champ da teater. Tge che vul dir, els exerciteschan l'entir di sin tribuna cun costums adattads e culissas gia montadas. Berthold Derungs e sia sora Romy Carigiet-Derungs èn gia dapli blers onns al timun da la gruppa. Reschia fa quest onn Berthold Derungs.
La glieud spetga sin quai ch'ella po puspè vegnir e rir da cor.
Atgnamain vuleva la gruppa preschentar la cumedia «la bubronda magica» gia avant trais onns, ma la pandemia ha sfurzà ella da spustar la producziun. Ed ils onns avant n'hai er betg dà in teater, uschia che quai fa set onns ch'i n'ha betg dà in teater a Siat. Normalmain fa la gruppa mintga dus onns teater.
En la cumedia umoristica «la bubronda magica» vai d'ina vart per in pur che sa lamenta ch'el haja bler mal. Nagin vul propi crair ad el, auter che la Culastia ch'emprova da medegiar il pur cun ervas e sirups. Plinavant ha la pura plans da metter ensemen ses figl cun ina dunna, ma lez vul in'autra. Sin il davos datti almain in spusalizi e segir ina buna fin.
Las acturas ed ils acturs han vesaivlamain plaschair dad esser sin il palc. La gruppa da teater da Siat ha en il mument 11 persunas ch'èn activas. Il facit tar las emprovas: il text sesa, ma vi dals moviments e la mimica ha la gruppa anc da glimar. Ella va tras scena per scena e suenter anc ina giada.
Nus avain uschè ina bella energia e quai èn bleras bellas uras.
L'applaus che nus survegnin è nossa paja.
La premiera è mesemna, ils 19 d'avrigl, da las 20:00 en la «Casa Sentupada» a Siat. Tschintg ulteriuras preschentaziuns suondan ils 22, 23, 26, 28 e 29 d'avrigl.
