Il grip da 300 m3, quai è ca. 1/3 d’ina chasa d’ina famiglia, sa chattava in pèr tschient meters sur il plazzal da la nova punt da la via chantunala che va tras Tavanasa en direcziun da Breil. Tenor Urban Maissen, il manader da la regiun Surselva da l' uffizi da guaud e privels da la natira, haja il selvicultur constatà durant ina controlla, ch’il grip s’era mess en moviment e periclitava il plazzal sco era la lingia da la Viafier retica a Tavanasa. Perquai hajan els decidì da siglientar il grip uschè spert sco pussaivel.
Via chantunala e viafier serradas, 7 chasas evacuadas
Durant la siglientada èn la via chantunala e la lingia da la Viafier Retica stadas serrada cumplainamain. Era var 20 abitants da 7 chasas èn vegnidas evacuadas ord motivs da segirtad durant la siglientada. Curt suenter la siglientada ha la via chantunala puspè savì vegnir averta. La lingia da la Viafier Retica resta serrada enfin mezdi, i curseschan bus da substituziun durant quai temp. Enfin che la crappa ch'è anc en la plaunca è segirada resta la via tranter la punt veglia da Tavanasa e la sbuccada en la via chantunala serrada . Tenor Urban Maissen vegnia quai a cuzzar intgins dis.
RR actualitad 11:00