Dus referents han declerà ord lur posiziun co interpresas pon communitgar. Dad ina vart èsi stà Curdin Janett. El è CEO da Publicis e ha survegnì quest onn la distincziun «Werber des Jahres 2015».
Il tempo dal svilup è ozendi fitg svelt. Quai è era tar la communicaziun uschia. Tgi che na vegn betg da tegnair pass cun quests svilups sto adina reagir e currer suenter, declera Curdin Janett en ses referat «Communicaziun en il marketing durant temps turbulents». I saja meglier dad esser davanttiers tar ils svilups. I saja dentant era impurtant da ponderar bain tge svilups ch’ins vul insumma far e tgenins ch’ins lascha star.
Sa posiziunar cler
Per ina fatschenta saja quai impurtant da sa posiziunar cler sin il martgà. Tenor Curdin Janett èsi da sa dumandar nua vul ins esser il meglier. E lura èsi era da guardar co il client realisescha era che quai è uschia e ch’ins po insumma tegnair quai ch’ins ha empermess. Quai che funcziunia era, saja esser auter ch’ils concurrents. Uschia crodian ins ord la massa e la clientella vegnia attenta sin la fatschenta.
L’istorgia è spert raquintada
Per la finala far ina buna reclama dovri ina clera istorgia cun in cler messadi. Sco Curdin Janett di, valia quai d’investir avunda temp per avair ina buna istorgia. Latiers sappian ins tschentar dumondas sco: Daco datti nus? Tge lain nus empermetter? Nua duai questa istorgia manar nus en 10 onns. Raquintada saja l’istorgia la finala spert.
Damain qualitad e mo quai ch’interessescha
Il segund referent è stà Patrick Senn. El è stà schurnalist tar gasettas e medias electronicas. Ussa cusseglia el fatschentas e persuna singulas co ir enturn cun medias. El ha declerà en ses referat ils mecanissems da las medias da massa. Il squitsch tar las medias saja gronds. Medias classicas sco las gasettas perdan abunaments e vegnan da vender damain reclama. Damain daners muntia era ch’i saja da spargnar tar las redacziuns. La consequenza è tenor Patrick Senn la finala ch’ils artitgels han damain qualitad. In ulteriura consequenza saja dentant era ils temas sco tals. I vegn prest scrit mo pli quai che vegn era consumà. Davart auters temas ch’èn tut tenor relevants per la societad na vegn betg rapportà.
Las ingredienzas per ina buna istorgia
Tenor Patrick Senn vegn rapportà en las medias, sch’ins po porscher buna istorgia. Quella dovra innovaziun. Qua vali da far la ponderaziun nua èn ins il meglier. La segunda ingredienza è l’erox. In protagonist che ha da schliar in problem u che ha da prestar insatge extraordinari. Sco terz dovri anc cuntraversas e clers messadis.
Discussiunà davart la communicaziun
En la discussiun da podium èn il tema communicaziun lura vegnì slagiar cun ulteriuras persunas. Sper Patrick Senn e Curdin Janett han era Flurina Caveng (possessura d’ina fatschenta d’optica e bischutaria), Bruno Hensler (rectur dal gimnasi da la claustra da Mustér) ed Armin Spescha (possessur d’ina fatschenta da communicaziun) fatg part. Els han raquintà co che la communicaziun funcziuna en lur fatschentas.
Trais puncts
Sin il punct ha la finala Patrick Senn mess la communicaziun cu el ha preschentà trais tips co communitgar. Discurrer simpel. Vul dir evitar pleds cumplitgads. Esser concret. Quai funcziuna cun far exempels. E la finala discurrer en curtas construcziuns. Flurina Caveng agiunta anc ch’in stoppia era esser autentic sch’ins veglia vender insatge a la clientella.
- Referat da Curdin Janett: “Communicaziun en il marketing en temps turbulents”.
- Referat da Patrick Senn: “Ils mecanissems dals meds da massa”.
- Suenter ils referats sa participeschan era anc Flurina Caveng, Bruno Hensler, Armin Spescha a la discussiun da podium.
Il ticker è a fin
-
16:26
Fin
Cun in grond applaus dals preschents è la discussiun al podium ida a fin. Per ils preschents datti ussa l’apero nua ch’ils novs impuls pon vegnir discutads.
-
16:23
Communicaziun è en in sien d’enviern
En il sectur da la communicaziun saja la Surselva en in sien d’enviern, declera Armin Spescha. I vegnia fatg grondas investiziuns en l’infrastructura. Lura restia nagut pli per la communicaziun.
Bruno Hensler è adina puspè surstà quantas persunas ch’enconuschan Mustér. I dess bleras istorgias da raquintar da la Surselva. La Surselva na saja dentant betg conscienta da las istorgias ch’èn avant maun. Tenor Bruno Hensler èn ils schefredacturs forsa er in zichel tschorv per la Surselva.
Patrick Senn manegia ch’ins stuessi lura era esser frechs e simplamain contactar quels e vender las istorgias.
Flurina Caveng manegia ch’ins stuessi communitgar in tranter l’auter meglier.
-
16:19
Percepziun da la Surselva
La Surselva è probabel memia pauc enconuschenta anorvers. Tenor Curdin Janett fissi da guardar tge ch’è avant maun ed empruvar da raquintar cun quai ina istorgia.
Patrick Senn manegia che la Surselva vegni strusch avant en las medias naziunalas. Pli baud haja el il sentiment che quai eri meglier. Probabel manchia in pau ils protagonists e las istorgias. I fiss da tschertgar questas persunas ed era las istorgias latiers che vegnissan en dumonda per las medias naziunalas.
-
16:16
Vardaivel ed autentic
Esser vardaivel ed autentic. Quai saja impurtant per che la clientella craja en ina fatschenta, di Patrick Senn.
-
16:12
Events
Flurina Caveng procura cun events da team per meglierar la communicaziun interna.
-
16:12
Communicaziun interna po reflectar anovers
Il carstgaun è il sulet che differenziescha ina fatschenta. Da quai è Armin Spescha perschvas. Sch’ins vegn da furmar ils collavuraturs tar ina cuminanza che stat davos la fatschenta, lura pon ins surviver. Quai funcziuna mo cun communicaziun interna. I dovra ditg enfin che la communicaziun interna reflectescha era anorvers e daventa vesaivla.
-
16:09
Memia fitg en la chaussa
Tar Curdin Janett n’è era betg tut ì bain. Ins possia era esser memia fitg en in tema uschia ch’ins emblida magari da restar simpel uschia che tuts chapeschian.
-
16:07
Autenticitad
Flurina Caveng è persvasa ch’igl è dad esser autentic e da betg empruvar da surmanar la glieud da cumprar insatge.
-
16:06
Trais chaussas
Patrick Senn dat trais tips: igl è da pledar simpel, evitar pleds cumplitgads. Bun è da far exempels concrets che mintgin chapescha. La finala saja da far curtas construcziuns.
-
16:04
Dicurrer da chaussas ch'ins na vul betg
Patrick Senn che cusseglia fatschentas e persunas da sa preschentar a las medias ha fatg l’experientscha ch’i dettia glieud che di, davart quai tema na discutass jau mai en las medias. Lura fetschia el la proposta da far in test e suenter vegnia quest analisà. La finala saja questa glieud da l’opiniun ch’i pudessan tuttina discurrer da quest tema.
-
16:00
Stgatschar cumplex
Curdin Janett è l’um davos la nova marca Salt, ch’era avant Orange. La fatschenta avevi in zichel cumplex perquai che Salt porschia sulet telefonia mobila en cumparegliaziun cun autras fatschentas da communicaziun. Quai cumplex saja stà da stgatschar. La finala saja la communicaziun mobila il futur.
-
15:57
Tge è il recept per avair success
Sco emprim ston ina fatschenta avair ina istorgia e la finala era esser persvas sa sasez declera Curdin Janett. Uschiglio n’han ins betg success.
Patrick Senn manegia ch’i dovra in conflict. Ina pitschna fatschenta per exempel che sto avair clientella.
Flurina Caveng di ch’ella haja adina da mirar ch’ella haja clientella en sia stizun.
Bruno Hensler tschertga schizunt en l’Asia students per il gimnasi da la claustra da Mustér. Per pudair surviver sco scol’auta ston ins enconuscher autras culturas ed esser pronts d’integrar novas culturas en l'agen menaschi. Sia istorgia è ch’ins po ir via Mustér a las meglras universitads. Questa istorgia duai manar al success.
Armin Spescha è ami da simpla communicaziun. El vul esser fitg manaivel a la clientella ed en la regiun. Quai saja ses recept da success.
-
15:50
La discussiun ha cumenzà
Legenda: Discussiun al podium RTR, G. Hosang -
15:31
Nizzegiar la pausa per stabilir e far novs contacts
Legenda: Durant la pausa. RTR, G. Hosang -
15:16
Discussiun al podium
Suenter la pausa datti ina discussiun al podium cun Curdin Janett (CEO Publicis), Patrick Senn (cusseglia persunas e fatschentas en fatgs da medias), Flurina Caveng (possessura d’ina fatschenta d’optica e bischutaria), Bruno Hensler (rectur dal gimnasi da la claustra da Mustér) ed Armin Spescha (possessur d’ina fatschenta da communicaziun).
-
15:09
Pausa
Suenter quests dus referats datti na pausa, la glieud banduna la halla per prender in pitschen refrestg e per discutar in cun l’auter.
-
15:08
Tge funcziuna e tge na en las medias?
Istorgias che funcziunan dovran innovaziun. Nua èn ins il meglier. Lura l’erox. Forsa è il patrun sez quest erox per uschia persunalisar l’istorgia. I dovra dentant era cuntraversas e clers messadis.
Products ch’i dat en massas n’èn betg d’avantatg per ina istorgia. Istorgias senza erox na funcziunan n’era betg, declera Patrick Senn. Tuttina èsi era cun cumpromiss. Era quests na funcziunan betg en las medias. Messadis che n’èn betg clers na vulan ils schurnalists n’era betg.
Cun questa resumaziun finescha Patrick Senn ses referat.
-
15:03
L’istorgia sto esser buna
Ina buna istorgia na sto betg esser producida tecnicamain fitg bain. Ins po era far quai fitg simpel. Principal è che l’istorgia è buna. L’istorgia sto dentant era constar cun l’interpresa.
-
15:01
Scuidanza e critica
Sch’ins vul pia vegnir en las medias dovri questas trais chaussa. Sch’ins ha lura sco fatschenta ina tala istorgia cun quests elements e che vegn en las medias, lura ston ins era quintar ch’i dat scuidanza ubain critica.
-
14:56
Tge dovri per ina buna istorgia?
Tenor Patrick Senn dovri trais chaussa per ina buna istorgia. Sco emprim dovra quai in protagonist - in erox. Lura ina tscherta relevanza – tgenina che quai è la finala era. Sco terz sto quai capitar cun il protagonist ina midada. Questa midada sa dat per il pli ord in problem.