Glindesdi sco era mardi notg è l’alarm en la Val Pulanera vegnì activà. Il sistem funcziuna cun ina suga ch’alarmescha moviments pli svelts da naiv en in territori. Pir a partir da quest onn datti insumma quest sistem d’avertiment.
La lavina è vegnida – ma sulet per part
Per part èn las spundas sa svidadas en la Val Pulanera, declera in dals responsabels per la segirtad da la vischnanca da Tujetsch, Silvio Decurtins. Ma tut la naiv n’è anc betg giuadora e pir il mument cura ch’ins po sgular sur il territori pon ins stimar la massa da naiv che sa chatta anc en il territori, declera Decurtins.
In privel per la lingia da la MGB
Chasas abitadas dal vitg da Rueras n’èn betg stadas en privel. Ina, duas stallas pli veglias sa chattian en zona cotschna, ma surtut la lingia da viafier e la via principala possian vegnir sutterradas da la lavina. Il meglier saja sche la naiv vegnia adina puspè e betg la primavaira ina lavina pli gronda, accentuescha Silvio Decurtins.
RR actualitad 08:00