Siglir tar il cuntegn
cuntegn

Surselva Situaziun precara sin las alps

Il pli fitg sajan las alps en regiuns bassas u da mez pertutgadas, ha ditg Thomas Roffler, il president da l'Uniun purila grischuna. Per exempel l'Alp Sogn Carli a Morissen: Tenor il chau tegia Silvan Caduff pudess la situaziun vegnir anc pli difficila.

Legenda: Guardar il video Situaziun precara sin l'Alp Sogn Carli sur Morissen. Durada 01:29 minutas.
Or da sil punct dals 03.08.2018.

L'Alp Sogn Carli sur Morissen en Val Lumnezia n'ha betg pli vis plievgia dapi la primavaira. Sche quai na dat nagina plievgia pli gronda en il proxim temp pudessan daventar necessarias mesiras seriusas: Per exempel importar pavel da la val u perfin stgargiar l'alp anticipadamain. Ma quellas mesiras vul ins sche pussaivel evitar.

Tenor Thomas Roffler, il president da l'Uniun purila grischuna dettia cunzunt trais problems: Per l'ina mainian las funtaunas ellas pastira na betg tant'aua sco auters onns. Per l'autra na possia il pastg betg crescher suenter, cunquai ch'i na plovia betg. Plinavant saja il pastg ch'i haja anc sec e quel survegnia betg avunda umiditad.

Alps pli autas betg uschè pertutgadas

Alps che giaschan pli aut, pia en regiuns pli alpinas, n'èn tenor il president da l'Uniun purila grischuna betg uschè pertutgadas da la setgira. Là hajan differentas alps la pussaivladad da laschar pascular lur muvel en regiuns pli autas, nua ch'ins n'haja fin uss anc mai pasculà.

Or da l'archiv - la setgira dal 2003

Legenda: Guardar il video Setgira sin l'Alp Sez Ner sur Vignogn il 2003. Durada 01:56 minutas.
Or da RTR dals 18.07.2018.

RR actualitad 12:00