Uschia n’ha il comité d'organisaziun betg mo planisà concerts en baselgias e hallas da gimnastica, era locals pli pitschens forsa main adattads per in concert vegnan duvrads. In da quests locals è la chaplutta da S. Gada, la pli veglia chaplutta da Mustér, bajegiada enturn l’onn 1100.Il plaz per ils aspectaturs n’è betg stà in problem damai che sulettamain 30 persunas èn vegnidas en la chapella per tadlar ils chors.
Nagina electricitad en la chaplutta
Ina chaplutta che ha tenor il dirigent dal chor da giuvenils Turitg Michael Gohl ina fitg buna acustica. Il sulet problem saja stà la temperatura plitost bassa. La chaplutta n’è betg attatgada a la rait electrica e na po per quai betg vegnir stgaudada.
Senza electricitad na datti era betg chazzolas en la chaplutta. Be pauca glisch natirala sclerescha l’intern da la chaplutta. Per las chantaduras ed ils chantadurs dal chor da giuvenils da Turitg n’è quai era betg stà in problem. Els chantan las chanzuns a memoria.
