Ils onns 1990 era ir cun snowboard il pli grond trend sin pista insumma. Dapi lura saja bler sa midà, ma la fascinaziun per ir cun l’aissa saja restada. Uschia senta la scola da snowboard «Sägerei Sedrun», in trend ensi. Surtut ils uffants da quels che eran gia ils onns 1990 sin l’aissa, vegnian en fatschenta per emprender il sport ed il pli savens laschian ils geniturs lura puspè s’inspirar dad era gist prender a fit u cumprar ina aissa, di Daniel Schmid, piunier da snowboard e possessur da la scola da snowboard cun stizun. El saja persvas ch’il sport d'ir cun l’aissa na vegnia betg a svanir uschè svelt.
Ir en la naiv nova è l’ultimativ
L’aissa saja surtut vegnida uschè attractiva tras la pussaivladad da ir naiv nova, di Daniel Schmid ch’ha fundà sia scola da snowboard il 1996. El saja anc adina mors da l'ir cun aissa, era sch’el fetschia uss quai dapi quasi 40 onns, di l’um che vegn quest onn 50. La fascinaziun saja anc adina qua ed el speria fitg ch’el possia era anc cun 80 onns ir cun aissa.
L'avegnir da sia scola da snowboard vesia el positiv, impurtant saja da sez avair plaschair, perquai che viver be da sia scola na possia el era betg, di Daniel Schmid. Ma il stil da viver e da vesair las chaussas, saja restà e vegnia a restar fin ch’el bandunia quest mund, ha ditg il scolast da snowboard e piunier.
