L’emprima part da la vita è son Martin in schuldà. Cun 15 onns è el numnadamain entrà sin giavisch da ses bab en il servetsch militar. Tenor la legenda è Martin restà 25 onns en quest servetsch militar fin ch’el è stà 40. Durant quest temp è el vegnì battegià da Hillarius da Poitiers, l’uvestg da quest temp.
Martin parta il mantè
Il pli enconuschent maletg da son Martin è quel ch’el parta il mantè cun il pauper um niv. Tenor la legenda duai quai esser succedì il 334 avant la citad da Amiens. Il pauper um niv è cumparì la notg en il siemi da Martin sco Cristus cun en ses mantè. Dasperas èn svelt vegnidas vitiers pliras miraclas che Martin duai avair fatg.
Martin l'uvestg
Suenter ses servetsch militar è Martin stà l’emprim in scolar da Hillarius da Poitiers. Alura è el sa chasà sin l’insla Gallinara datiers da Genua. Sin quella insla abitava Martin sco eremit, ma perquai che blers aderents èn suandads el, ha el puspè bandunà quest lieu. El è viagià sin quai per visitar sia mamma en la Panonia, nua ch’el ha era battegià ella. Sinaquai è el puspè returnà en Frantscha nua ch’el ha fundà il 361 a Ligugé l’emprima claustra en l’occident. Il 372 è el vegni nominà uvestg da Tours e curt suenter ha el fundà in'ulteriura claustra.
Martin il missiunari
Martin vala sco liom tranter la baselgia romana e l’imperi dals francons. El ha vivì fitg ascetic e gia da ses temp valeva el sco ideal d’in sacerdot ed uvestg. Martin ha approfundà cun ses engaschi en favur dal cristianissem la cardientscha cristiana surtut en Frantscha. Tenor la legenda duai el avair destruì plirs lieus da cult dals pajauns, ed erigì en quests lieus baselgias u claustras cristianas. Tenor la tradiziun è Martin mort ils 8 da november 397 a Candes. El è vegnì sepulì ils 11 da november a Tours.
Vita Sancti Martini
Il biograf da la vita da Martin, Sulpicius Severus, ha nudà il 395 la vita da Martin. Cun quest'ovra ha el fatg popular l’agir da l'uvestg da Tours. Cunquai che Martin è mort d’ina mort natirala e betg sco martir vala quest'ovra sco exempel per ina vita da confess. Cura che Martin è vegnì numna sontgs n’è betg enconuschent, ma gia il temp mez tardiv vegn Martin venerà surtut en l’intschess francon.
Vopna da la Cadi
Il son Martin ha ina gronda impurtanza en il Grischun. Uschia èn bleras baselgias, cunzunt veglias, deditgadas a son Martin. Quellas èn da chattar per exempel a Cuira u era a Mustér. Il cumin da la Cadi ha en sia vopna il son Martin che parta il mantè, tuttina sco la vischnanca da Medel e da Flem.
Martin oz
Il di da son Martin ha il di dad oz pliras tradiziuns. Uschia vegn l’auca stgavazzada a Sursee chantun Lucerna. En bleras regiuns vegn era fatg tils cun glischs ed era fieus da son Martin. A Mustér datti gia dapi blers onns la fiera son Martin, lezza ha dentant surtut da far cun la fin da l'onn agricul.
RR actualitad 06:00