Las uniuns da giuventetgna da Mustér mainan atras mintg’onn l'usit da Son Niclà. L’onn passà han ils responsabels da l’Uniun da giuventetgna Vitg e da las sis ulteriuras uniuns da giuventetgna da la vischnanca empruvà da far ina midada. Uschia èn tuts set Son Niclàs da Mustér ids ensemen atras il vitg ed han fatg alura ina messa da Son Niclà.
Quai han els fatg senza asens – in unicum a Mustér. Ils pli giuvens en l’uniun tiran numnadamain en costums dad asens cun mascra e stgellas e curran tras il vitg per metter a chasa la buobanaglia. Ils resuns è l'onn passà dentant stà, ch’ils asens fetschian er part da Son Niclà. E perquai fissi stà previs quest onn da laschar currer els, di Leander Etter il president da l’uniun da giuventetgna Vitg.
Tut fiss stà auter ma uss è quasi nagut pli
Da principi era planisà da laschar s’entupar il Son Niclà cun ils uffants a Son Placi sin l’anteriura plazza da ballape. Il spazi fiss stà avant maun, ma sin dumonda, ha la vischnanca alura recumondà a las uniuns da giuventetgna da betg organisar entupadas e da porscher sche pussaivel sulet regals sco Son Niclà da la notg.
Las uniuns da giuventetgna da Mustér fan uss quasi tuttas quella purschida, cumplettescha Leander Etter. Ma impurtant saja da pudair mantegnair era en futur l’usit e quai basegnia engaschi. Els sajan en tut circa 35 commembers e da quels 25 activs, e quai saja gia ina buna premissa per pudair far quai.
Uniun dovra commembers
Per pudair insumma esser avunda persunas en l’uniun da giuventetgna basegna quai era dad ir tar la giuventetgna. Pli baud era mintgin direct commember, quai fiss era uss il cas. Ma blers – era da quels cun ragischs forsa betg da Mustér – na san betg, tge che nus faschain ed uschia essan nus stads tar la davosa classa en scola ed avain fatg attent sin nossas activitads. Il resun saja positiv, di Leander Etter.
I saja era necessari dad integrar per exempel ils giuvenils cun ragischs portugaisas per che propi tut la giuventetgna fetschia part da l’uniun e qua sajan ins uss era in pass enavant. Quai saja fitg legraivel, di l’um da 22 onns che di sez ch’el saja quasi gia uss il vegl en l’uniun.