Avant in'emna han las soras dominicanas da Glion communitgà ch'ellas veglian tut tenor vender ils stabiliments da la claustra a Glion. Sco las responsablas da la claustra han infurmà uss, vegnia il burdi da mantegnair tut ils stabiliments memia grond ed uschia vul la communitad da las soras sa distatgar da quest pensum.
La claustra da Glion è vegnida fundada l'onn 1865. Il temp da fluriziun haja ella gì ils onns 1960, scriva il cussegl da fundaziun. Là sajan stadas fin a 560 soras a Glion ed en 42 filialas per il mund enturn.
Suenter il 1989 n'è dentant nagina dunna entrada en la claustra permanentamain. Actualmain vivan uschia be pli 61 soras en la claustra a Glion. La media da vegliadetgna munta ad 86 onns – la mesadad da las soras vegn tgirada en l'atgna chasa d'attempads e da tgira.
Dapi il 2024 è vegnì elavurà in studi davart la realisabladad per eruir scenaris per il futur da la claustra. Emprimas ideas èn vegnidas preschentadas cun l'exposiziun «anavon casa vinavon».
Da las differentas opziuns ch'il studi ha mussà, è il cussegl da fundaziun sa decidì da persequitar l'opziun da vendita cun prioritad. Quella varianta haja divers avantatgs per il convent.
La vendita purtass a las soras levgiament emoziunalmain, dal manaschi ed era finanzialmain. La clausura, construida per 200 soras porta gronds sforzs per la cuminanza da be pli 61 soras. Vinavant saja l'incumbensa da la claustra realisada suenter bun 160 onns en Surselva. Uschia che la cuminanza possia sa retrair da la vita publica.
Vinavant surpassian opziuns sco da dar a fit u sviluppar vinavant il cumplex d'edifizis las pussibilitads da las soras. Vendita na munta dentant betg da vender tut e bandunar Glion.
Ils stabiliments da la scola ed era la baselgia vulan las soras salvar per agen diever – ina pitschna part da tut l'areal. Tut il rest dals edifizis duain vegnir vendids per sviluppar spazi da viver per giuven e vegl sco era ateliers ed in café.
Enfin en in onn duai vegnir sclerì sch'igl è insumma pussaivel da vender ils stabiliments e lura va quai natiralmain era per chattar in cumprader che na po betg gist far quai ch'el vul, sco la priura, sora Annemarie di.
Sche tut va tenor ils plans, las soras dominicanas da Glion lessan retrair la nova claustra pli pitschna l'onn 2030. A partir da lura savessan ils novs possessurs era cumenzar cun la sanaziun dals edifizis da l'anteriura claustra.