Cun il nov num «Center da sanadad» vegn mussà en tge direcziun che l'ospital da Glion – fin qua Spital regiunal Surselva – duai sa sviluppar. En futur vul l'ospital porscher dapli tractaments ambulants. Per quest intent collavura l'ospital da Glion pli stretg cun las chasas da tgira, la spitex ed ils medis da chasa.
Pratica communabla per ils medis da chasa
Per meglierar la situaziun dals medis da chasa a Glion vul l'ospital installar en las localitads da l'anteriura centrala d’urgenza 144 ina pratica communabla. Adina dapli medis da chasa han difficultads da chattar in successur per lur praticas. Cun quest model da lavurar fissan las substituziuns dals medis regladas ed ils medis da chasa avessan pli bleras pussaivladads d'organisar lur vita dasperas il mastergn.
Per mai èsi cler, ch’ils medis da chasa lavuran en questa pratica. Nus vulain metter a disposiziun las localitads e sch’i dovra prestaziuns. L'ospital sez na porscha betg medischina da medis da chasa.
Ulteriuras localitads vul l'ospital era metter a disposiziun al servetsch psichiatric dal chantun Grischun. Per quest intent è planisà da stgarpar giu las duas chasas veglias che l'ospital ha acquistà sin la parcella cunfinanta e construir là in bajetg nov. Sper il servetsch psichiatric èn planisads en quest bajetg er las localitads da fisioterapia, stanzas da pichet e studios per il persunal. Cun las mesiras instradadas vul l'ospital mantegnair e garantir in bun servetsch medicinal per la regiun Surselva.
Prestaziuns dublas n'èn nagin problem
Ord vista da l'Uffizi da sanadad chantunal na fissi nagin problem, sch'i dess en il sectur ambulant purschidas medicinalas dublas cun la nova residenza da sanadad ed il Spital regiunal Surselva. L’uffizi è da l’opiniun ch'il martgà sto reglar las purschidas giavischadas en ina regiun.
RR actualitad 07:00