Dapi onns cumbatta il Spital regiunal Surselva cun sfidas finanzialas. Avant passa dus onns ha l'instituziun perquai dumandà las vischnancas per in pachet da salvament finanzial da passa tschintg milliuns francs. Dapi lura datti grondas discussiuns davart la finanziaziun ed er davart la purschida ch'i duai dar en l'ospital a Glion. Il november 2024 ha la radunanza da delegads lura decis da laschar examinar la situaziun da la Spital Regiunal Surselva SA. Ina interpresa externa aveva fatg las suandantas recumandaziuns:
- Mantegnair l'ospital acut cun ina purschida da prestaziuns reducida: Questa varianta prevesa ina purschida pli pitschna e qua tras in regress da la svieuta. Tenor l'analisa muntass quai ina reducziun da persunal da 9%. La partiziun da chirurgia vegniss reorganisada. In ulteriur punct è da stritgar la partiziun da naschientschas, ginecologia e la pediatria. Er operaziuns a partir da la saira da las 18 uras duain vegnir stritgadas.
- Center da sanadad ambulant: Enstagl da l'ospital acut sco fin qua prevesa la segunda varianta in center da sanadad ambulant senza prestaziuns staziunaras. Quai muntass, tenor l'analisa ina reducziun da persunal da 76% (49 plazzas cumplainas). Questa varianta fiss ina midada da paradigma. Ella n'è actualmain dentant betg pussaivla pervia da las prescripziuns politicas.
Responsabels vulan mantegnair ospital acut ed er la partiziun da naschientschas
Malgrà ch'il studi scusseglia da mantegnair tut las purschidas vulan ils responsabels da la Sanasurselva e dal Spital regiunal Surselva mantegnair il status quo ed uschia star davos l'ospital regiunal. Er la staziun da naschientschas duai vegnir mantegnida malgrà las grondas sfidas. Cunzunt la mancanza da persunal qualifitgà en quest sectur fetschia fastidis. Questa situaziun s'accentueschia l'auter onn anc pervia d'in pensiunament. Sco quai ch'ils responsabels scrivan, possia questa partiziun be cuntinuar sch'ins chattia enfin la fin da mars 2026 ina successiun adattada. Uschiglio stuess la partiziun da naschientschas vegnir serrada la fin dal 2026. In concept d'urgenza garantiss lura ina tgira segira e professiunala da mammas ed uffants nov naschids.
A Glion neschan actualmain radund 120 uffants mintg'onn. Quai è lunsch sut la grondezza critica da passa 500 naschientschas, per cuvrir ils custs.
Spargnar 1,5 milliuns francs cun optimar process
Spargnar vulan ils responsabels cunzunt cun reorganisar l'ospital. La finamira saja da far respargns annuals da maximalmain 1,5 milliuns francs. Quai saja però be pussaivel cun stritgar la partiziun da naschientschas, ha confermà René Epp, il president da la Sanasurselva. Ils respargns duain rinforzar la situaziun economica da l'ospital e garantir in provediment da sanadad persistent, da buna qualitad e supportabel per la Surselva. Pia senza engrevgiar la situaziun finanziala da las vischnancas purtadras, hai num en la communicaziun da medias.
Integraziun en il concept chantunal da sanadad e la Reit da Sanadad Surselva
Ils responsabels vulan che la nova cunvegna da prestaziun ch'è necessaria a partir dal schaner 2027 sa basa fermamain sin il nov concept chantunal da sanadad che duai vegnir publitgà la primavaira 2026. Quest concept vegnia a metter il focus sin il provediment da sanadad decentral ed als basegns en las regiuns dal chantun Grischun.
A partir dal 2027 duai l'ospital daventar ina part da la Reit da Sanadad Surselva. Questa structura reunescha ospital, chasas da tgira e spitex ensemen sut in tetg. Quai saja in proxim impurtant pass ad in provediment da sanadad coordinà, effizient e persistent en la Surselva, scrivan ils responsabels.