Siglir tar il cuntegn

Header

video
Cun la bartga dal Rain giu
Or da RTR Social dals 18.07.2022.
laschar ir. Durada: 53 Secundas.
cuntegn

Sport da temp liber Cun bartga da gumma tras la Ruinaulta

La Ruinaulta è mintga stad in dals lieus principals per il riverrafting en Svizra. En ina stagiun van bel e bain 10'000 persunas a bord d'ina bartga da gumma, d'in «raft». RTR ha reservà in plaz sin in da quels.

In gruppa da 40 persunas spetga tar il retschaviment da la fatschenta che porscha las aventuras sin l'aua a Glion. Suenter l'inscripziun per la tura en bartga da gumma, datti in bainvegni. Mintgin e mintgina survegn in vestgì da neopren, ina vesta da nudar, ina chapellina ed ina pala. L'emprim instruescha in mainabartga co il moni da la pala è da tegnair e tge ch'igl è da far, sch'ins dat en l'aua. La segirtad ha la pli auta prioritad a bord. Silsuenter vai a la riva, las equipas da 8 fin 10 persunas van en lur bartgas. Ina, duas giadas stuschar per exercitar, e lura vai liber.

Il viadi tras la chavorgia dal Rain è 20 kilometers lung. A l'entschatta è il flum anc ruassaivel. A l'autezza da la Val da Carrera vegni pli selvadi. Il punct culminant è la «ruosna nera», là nua ch'ils turnigls d'aua èn il pli ferm. Curt suenter suonda il «santeri da bartgas». En quest lieu blocheschan las bartgas savens, surtut cura ch'il Rain maina pauc'aua. Quai n'è betg in naufragi. Igl ha num, ir ora e stuschar.

Sco mainabartga datti bler d'emprender... tut ils aspects da segirtad e co il flum sa mida.
Autur: Will Wozencraft mainabartga

L'ultim tschancun è puspè pli ruassaivel. Ils sportists e las sportistas da temp liber pon uschia ina giada contemplar las turs da la Ruinaulta or dad ina nova perspectiva. L'aventura va a fin a La Punt/Reichenau.

Il traffic atras la Ruinaulta è reglamentà

Thomas Rogenmoser, numnà «Toro», è dapi passa 25 onns scolast da canu, e dapi 2001 societari da la scola da canu a Versomi. El organisescha tranter auter turas dad ir cun bartgas da gumma.

Il riverrafting n'è betg ina experientscha per l'adrenalin, mabain ina experientscha en la natira.
Autur: Thomas Regenmoser

Tut las persunas che vulan ina giada far ina tala tura, han sulettamain da prender cun in pèr chautschas da far bogn. La premissa è ch'ellas possian nudar. Il rest dal material vegn mess a disposiziun da l'organisatura. Ils osps han da remblar sez e suandar ils commandos d'in mainabartga. Lez è responsabel per las persunas ch'èn en sia bartga.

Il traffic atras la Ruinaulta è reglamentà. Las bartgas ston esser immatriculadas. Tgi che fa turas commerzialas n'ha betg mo d'avair ina lubientscha, mabain era ina gestiun da qualitad. Tar lezza tutga tranter auter ch'ils mainabartgas èn scolads. La Swiss Outdoor Association, pia l'organisaziun tetgala da quai sport, porscha quellas scolaziuns. La segirtad haja la pli gronda prioritad e las interpresas che porschan quai sport, ston avair ina segirada da responsabladad. La popularitad dals sports sin l'aua en la Ruinaulta vesan ins la stad, la stagiun auta da quest sport.

Or da l'archiv:

video
Scolaziun da Riverrafting
Or da Telesguard dals 13.09.2001.
laschar ir. Durada: 2 minutas 7 Secundas.
video
Nova lescha per il Riverrafting
Or da Telesguard dals 03.02.2000.
laschar ir. Durada: 2 minutas 34 Secundas.

RTR actualitad 12:00

Artitgels legids il pli savens

Scrollar a sanestra Scrollar a dretga