Da la Bundesliga enconuscha il «Hamburger Sport-Verein» mo plazzas da ballape perfetgas. Cler che quai sto era esser il cas durant il champ da trenament a Schluein. La lunghezza dal pastget è fitg impurtanta. Perquai vegn la plazza segada, per regla, ina giada per di.
In greenkeeper che sega la plazza durant il champ dal HSV è Ronny Della Morte da Glion. Sco quai ch’el di, saja impurtant da segar ina giada per di la plazza. Ils giugaders e trenaders dal HSV veglian numnadamain vesair il muster dal pastget.
Per segar la plazza principala plus la plazza da trenament dasperas dovri bun in'ura e mez, di Ronny Della Morte.
Per in club da la Bundesliga fan ins gugent questa lavur
Il HSV è in club da tradiziun en Germania. Uschia saja quai era ina lavur ch’ins fetschia gugent, di il giuven da 24 onns. I saja schon ina pitschna onur. In club sco il HSV na saja betg mintga di sin visita.
Jau hai segà ina plazza per in club da la Bundesliga, quai na sa betg mintgin dir.
Cun in’equipa rinforzada cunter il HSV
Pli che diesch giugaders da differents clubs grischuns e dal Principadi dal Liechtenstein dattan cun la US Schluein-Glion il gieu cunter l’equipa da la Bundesliga.
Quai èn giugaders da las equipas da Domat, Tusaun, Laax, Eschen-Mauren e Balzers. Dad Eschen-Mauren, in’equipa d’emprima liga, vegn Marco Colocci. El ha sajettà 16 gols en la stagiun passada, e davent da la stagiun che suonda dat el en la Promotion League cun Zürich United. In auter rinforzament vegn da l’equipa d’emprima liga da Balzers, il giuven talent da la Cadi Rafael Deplazes.
Insaco han ins il sentiment, ch’els hajan 3 giugaders dapli sin la plazza.
Sper vulair rinforzar l’equipa datti anc in segund motiv che Schluein-Glion ha dumandà auters giugaders da dar quest gieu. A l’equipa da Schluein-Glion mancan blers giugaders pervi da vacanzas. Auters han gì in program fitg pulpì cun il campiunadi, e silsuenter anc l’Europeada en il Tirol dal sid.
RR actualitad 17:00