Siglir tar il cuntegn
Inhalt

Surselva Stadion Crap Gries a Schluein è nominà per premi d’architectura

Plirs objects en il Grischun èn nominads per il premi d’architectura per renovar e construir a moda durabla en las Alps. Tranter quels era il stadion da ballape Crap Gries a Schluein e las staziuns da la pendiculara a Vicosoprano en Bregaglia.

Sco che l’Uffizi federal da svilup dal territori ha communitgà ha la giuria cun represchentants da tut ils pajais da las Alps nominà 30 projects 10 da quels sa chattan en Svizra.

Cun quest premi vegnian premiads edifizis en las Alps cun in stil da construir durabel. La Svizra ed il Principadi da Liechtenstein organiseschan l’occurrenza «Constructive Alps» per la quarta giada. Il premi è dotà cun 50’000 euros e vegn surdà l’october da quest onn.

Las emnas proximas vegn ina giuria

Sco l’Uffizi federal scriva vegnian ils proxims dis ina giuria a visitar tut ils bajetgs nominads. Tranter ils nominads en il Grischun sa chattan la Chasa Steila Mar a Susch, il teater d’enviern d’Origen a Riom, il bajetg da manaschi da l’ustaria a Davos Munts sur Vella, la renovaziun da las stallas d’alp sin l’alp Glivers sin intschess da la vischnanca da Sumvitg e a Madulain la Engadin River Ranch.

Constructive Alps

La Svizra ed il Principadi dal Liechtenstein surdattan per la quarta giada il «premi internaziunal per sanaziuns e construcziuns persistentas en las Alps». Il premi vegn finanzià dal Uffizi federal da svilup da territori communabel cun l’Uffizi d’ambient dal Liechtenstein. La giuria vegn a nominar trais victurs che partan alura ils daners.

RR novitads 12:00