Suenter dus onns pausa sfurzada pervia da Corona organisescha la Regiun Surselva puspè il bus da notg per la giuventetgna da la Surselva. Quel cursescha davent ils 17 da december 2022 fin ils 24 da mars 2023 mintga sonda notg.
Augmentà la purschida
Enfin avant dus onns cursava il bus da notg mintgamai da Laax fin Sedrun e da Glion enfin Vrin. Questa stagiun mainan ils curs davent da Glion a Sedrun, Vrin e Sursaissa. Sco novum maina in curs ussa er en la chapitala grischuna a Cuira.
Sin fundament d'ina lavur che nossa emprendista ha fatg avain nus constatà che la gronda part da la giuventetgna Sursilvana va a Cuira en sortida. Sin quest fatg avain nus reagì.
Per pudair fa diever dals bus da notg che curseschan mintgamai la notg da sonda sin dumengia tranter l'ina e las quatter dovran ins u ina charta da donaturs che custa 50 francs per stagiun u in auter bigliet valaivel per il traffic public. Cun la charta da donaturs san ins mintgamai far diever da tren ed auto da posta en Surselva tranter la sonda a partir da las 17:00 enfin la dumengia damaun a las 05:00.