Da tschintg alps en il conturn dal vitg da Breil en Surselva vegnan ils radund 650 animals manads tradiziunalmain communabel en il vitg. La stgargiada da Breil è probabel ina da la grondas en l’entir chantun. Bleras turistas e turists vegnan aposta per guardar a Breil, uschia èsi grev da chattar la fin d’emna da stgargiada anc in letg en il vitg turistic, pertge tut ils hotels èn plains e la glieud vegn a far festa, declera la responsabla per la restauraziun Marta Cathomas. Uschia saja pussaivel da mussar l’agricultura d’ina vart positiva, declera la pura da Breil.
In zic pli pauc latg
La stad saja stada fitg buna era sch'i saja stà sitg, uschia il responsabel da las alps a Breil Mario Seiler. Las pasturas ed ils pasturs hajan fatg buna lavur ed uss cura ch’ins decoreschia ils animals cun flurs e tschupels saja quai adina in mument fitg emoziunal, probabel per tuts, di il pur da Breil. Per la populaziun indigena èsi medemamain in di da festa nua ch’ins po entupar blera glieud da sisum la Surselva fin a Cuera, di in um indigen. E dasper la folclora èsi er in segn che la stad va a fin e che la tradiziun d’alpegiaziun resta ina tradiziun vivida en il Grischun, almain per ils proxims onns.