L’interpresa Giger SA a Segnas è spezialisada sin pignas-scalegl. La dumonda per pignas-scalegl è constanta, di Uve Giger che maina la fatschenta ensemen cun ses frar Ivan. Il mument hajan els mintga di trais fin quatter telefons per laschar far in'offerta. Alura saja l’emprima dumonda: Sin cura vulais vus ina pigna-scalegl. Actualmain saja quai da spetgar in mez onn. Pli baud era quai la mesadad, di Uve Giger ch’ha sez emprendì da tschentapignas.
Supplementar ina pigna-scalegl en stiva
Las dumondas per laschar metter ina segunda pigna, dasper in stgaudament d’ieli u da gas, èn s’augmentadas surtut si da la Bassa. Ma els na possian gnanc producir dapli, perquai che l'infrastructura saja il mument occupada dal tut. Quai era sche la dumonda saja creschida, accentuescha il mainafatschenta. Era ils lavurers na stoppian betg far dapli uras ch’usità u renunziar sin vacanzas. Els emprovian da tgirar lur collavuraturs, pertge ins na chattia betg simpel buns lavurers.
Duas pignas l’emna
Il mument produceschian els circa duas pignas per emna. La gronda part da quella è da scalegl importà a moda gronda che vegn elavurà. Circa 20% cun scalegl indigen or da la chava al pe dal Calmut. Els hajan dentant explotà tut la crappa or da questa chava. Suenter stoppian els tschertgar ina soluziun. Ma quai duria sur sia pensiun ora, di Uve Giger che vegn l’onn proxim 50 onns.