Tenor Gabriel Venzin che maina la gruppa da lavur «Pro Associaziun Stizun» sajan els uss sut squitsch da chattar ina soluziun. Els na quintavan betg che la stizun serria uschè svelt. Ma quai possia er purtar anim a la gruppa da lavur da chattar svelt ina soluziun. Durant ils dus inscunters planisads veglian els sentir da la populaziun sch’ella veglia er la stizun, ma quai dovria er in engaschi da collavurar e la finala da vegnir a cumprar en la stizun dal vitg, accentuescha Gabriel Venzin.
Ma els sajan da buna speranza da pudair realisar fin Pasca in concept, e da chattar ina persuna indigena che vul manar la stizun. La sfida saja d’ina vart da chattar la persuna ideala e da l’autra da survegnir il sustegn da la populaziun per realisar il project. Communablamain possian els reussir, manegia Venzin. La vischnanca da Medel vul uss era far pli svelt las lavurs da mantegniment vi da la chasa communala. Quellas lavurs fissan stadas previsas da far il 2024, uss ston tschertas lavurs vegnir fatgas pli svelt, di il president communal Claudio Simonet. Ma la vischnanca haja grond interess ed els vegnian a far tut per che la stizun restia en vischnanca.
Manadra actuala serra ord motivs finanzials
Cun grev cor serra la manadra actuala Anna Acton l'affar, uschia ha ella infurmà avant curt. Cun serrar la stizun svanescha er l'agentura da posta integrada ed in lieu da sentupada en il vitg. In'associaziun vul dentant tschertgar ina via co mantegnair la purschida. Quai vegnia dentant anc a cuzzar enfin almain Pasca l'auter onn, uschia la «Pro Associaziun Stizun».
Emprova da mantegnair la stizun
Avant tschintg onns ha la manadra Anna Acton fundà la Bergwind GmbH e manà la stizun sin agen quint. Sper atgna investiziun ha ella survegnì sustegn da l'Agid svizzer da muntogna, da la vischnanca da Medel sco er d'intginas persunas privatas per cumenzar l'avrigl 2017 cun l'affar. Tenor la manadra da la stizun saja dentant sa mussà che la stizun na possia betg surviver senza agid public – uschia ch'ina associaziun è vegnida activa. Malgrà l'engaschi è la situaziun finanziala sa pegiurada ils ultims mais, uschia ch'ella stoppia smetter. Ella spera ch'i reusseschia a la gruppa «Pro Associaziun» da chattar ina nova soluziun per la stizun.