L’investider Remo Stoffel che vul bajegiar ina tur da 381 meters a Val S. Pieder renviescha las rinfatschas da corrupziun e favurisaziun. Quai scriva la gasetta Schweiz am Sonntag. Quellas rinfatschas sa drizzian vers el persunalmain e violeschian sia onur. Tenor Stoffel veglia il professer emerità criminalisar el. Cun ses advocat Andreas Meili instradeschi el uss pass giuridics vers Schweizer.
La gasetta Tagesanzeiger aveva publitgà avant bun in’emna in artitgel ed in’intervista cun Rainer J. Schweizer. En quest artitgel inculpescha Schweizer la vischnanca da Val S. Pieder d’avair fatg sbagls massivs en connex cun la vendita da la Therme e da l’hotel. Cunter il Tagesanzeiger na portia Remo Stoffel betg plant per il mument. El tschertgia sco emprim il discurs cun il chau-redactur scriva la gasetta Schweiz am Sonntag.
