Pervi da la depopulaziun, la mancanza da lavur entras la Neat ed era perquai ch’il turissem daventa era pli flaivel ha Reto Schmid fatg ponderaziuns davart l’avegnir da sia pasternaria. «E lura hai gì num u pensar da serrar la fatschenta ni far products ch’ins po vender ordaifer la val» declera Reto Schmid che ha surpiglià 2004 la fatschenta da ses bab. El ha alura fatg ponderaziun davart plirs products ed è la finala vegnì sin l’idea da far pitschnas turtas da nuschs. Savens haja el udì che clients hajan ditg ch’els hajan fitg gugent las turtas da nuschs, ma che quellas sajan memia grondas e sch’ins mangia be in pitschen toc e lascha star il rest sche daventia la turta sitga. Quai è stà l’inspiraziun da far in turta ch’è uschè pitschna ch’ins po mangiar ella en duas buccadas. Uschia ha el creà ina marca cun il num La Conditoria – Sedrun Switzerland per derasar las turtas.
Ina lunga via
Per far las turtas ha Reto Schmid gì l’idea ch’i duvrassi ina maschina. Damai ch’ina tala n’existiva betg ha el laschà crear ina tala. Quai haja cuzzà ditg fin che quella haja producì turtinas senza sbagls. Ma cun la maschina n’è la lavur betg stada finida. Per pudair vender las turtinas haja quai duvrà differents pachetadis e clers concepts en tge furma e quantitads che quai po vegnir furnì. Pir cun tut questas infurmaziuns haja el pudì far contractivas cun detaglists ubain auters cumpraders da las turtinas. Ussa pon ins cumprar quellas en bleras butias da victualias en Svizra, Austria ed era la Germania.
Success pli grond che spetgà
Las emprimas turtinas èn vegnidas producidas il 2014. Per il 2015 aveva Reto Schmid planisà da far 300’000 fin 500’000 turtinas. La finala haja el vendì 3 milliuns. Ussa per il mais da schaner ston gia vegnir producidas 1 milliun turtinas. Perquai vegn lavurà en squadras durant 24 uras. 50’000 turtinas per di vegn producì. Sper tut quai vegn tschertgà da vender las turtinas en ils Stadis Unids da l’America ed era en l’Asia. Uschia ha Reto Schmid era engaschà dus managers d’export. In a Singapur ed in a Londra.
Per ses products ha el gia survegnì plirs premis e medaglias (2015 la cruna da pasterners svizzers).
Mantegnair plazzas en la regiun
Sia finamira saja da mantegnair plazzas en la regiun, di l’interprendider da Sedrun. Perquai ch’il spazi da producziun manca, vul el era engrondir sia interpresa.
Previs èsi da construir in bajetg da 1000 meters quadrats a Sedrun.