Siglir tar il cuntegn
Domenic Lanicca cun ses partenari da cumbat XY (disciplina bunkai) cun lur medaglias.
Legenda: Domenic Lanicca (sanester) cun ses partenari da cumbat en la disciplina bunkai Horst Baumgürtel dal club Goju-kai Berna. MAD

Surselva Success per ils cumbattants da carate da Glion

Al campiunadi europeic da carate en il stil Goju-kai è Domenic Lanicca da Ruschein (37) daventà campiun europeic en la disciplina bunkai e vice-campiun en la disciplina kata. Il giuven Nico Mognetti (16) da Rabius ha gudagnà la medaglia da bronz en la disciplina cumbat liber.

En la disciplina bunkai, ina disciplina nua che dus sportists mussan in cumbat preparà cun attatgas e defensiuns planisadas, ha Domenic Lanicca persvas ils derschaders ed è daventà campiun europeic. Vinavant ha el gudagnà la medaglia d’argient en la disciplina kata. En quella disciplina mussa in cumbattant ina seria prescritta da moviments. Impurtanta è l’execuziun exacta e tecnicamain schubra dals moviments.

Medaglia da bronz per Nico-Alessandro Mognetti

Nico-Alessandro Mognetti sin il terz plaz dal podest da la disciplina cumbat liber.
Legenda: Nico-Alessandro Mognetti ha gest retschavì sia medaglia da bronz. MAD

Per ina surpraisa ha procurà il giuven cumbattant Nico Mognetti (16) da Rabius. En la categoria cumite, il cumbat liber, ha el gudagnà la medaglia da bronz. Ina medaglia plitost nunspetgada, perquai che quai è stà igl emprim turnier da carate per Nico Mognetti. Quella medaglia è per il giuven l'emprim pass en direcziun dal campiunadi mundial, che è 2017 a Tokio.

Artitgels legids il pli savens