Siglir tar il cuntegn

Header

Navigaziun

cuntegn

Suenter sentenzia – il dialog Possessurs da segundas abitaziuns da Flem Laax Falera sin viadi

Gia dapi onns datti dispitas tranter ils possessurs da segundas abitaziuns e las vischnancas da Flem, Laax e Falera. Il motiv èn las taxas turisticas ch’èn vegnidas augmentadas. Fin al Tribunal federal è il cas vegnì e lez ha decis en disfavur dals possessurs da segundas abitaziuns. Entant ha l’organisaziun turistica envidà ils possessurs da segundas abitaziuns, represchentants da las vischnancas e dal turissem a pliras occurrenzas.

Chattar il dialog

Mo cun talas occurrenzas possian ins chattar il dialog cun ils possessurs da segundas abitaziuns, argumentescha André Gisler il directur da la Flem Laax Falera Management SA. Els porschian gia dapi 5 onns occurrenzas da tut gener als possessurs da segundas abitaziuns e blers prendian extra liber per pudair sa participar. Quai saja mintgamai in grond success, accentuescha Gisler.

Betg tuts èn cuntents cun la decisiun da Losanna

La sentenzia dal Tribunal federal n’è dentant anc betg magunada tar tuts preschents. In um è dal avis che finalmain dettia ina purschida, pertge ils daners da cura sajan s’augmentads ils ultims onns marcantamain. Uss saja temp da giudair, enstagl da laschar mulscher adina, di l’um. Ma per ils blers n’è la decisiun da Losanna nagin tema u ch’ella è dal tuttafatg nunenconuschenta.

La carta da giasts n’è betg enconuschenta

La carta da giasts che vegn era purschida als possessurs da segundas abitaziuns n’è betg enconuschenta a mintga preschent. Ma talas purschidas possian far pli enconuschentas las purschidas existentas ed ils plans sajan da introducir ina carta da giasts digitala ed era d’augmentar las purschidas per exempel cun golf, di André Gisler.

RR actualitad 17:00