Translatà la cumedia per rumantscha ha Venanzi Nay ed igl è ina premiera rumantscha la proxima sonda a Sumvitg. La gruppa saja bain preparada e tuts sa legrian da pudair mussar il toc al public, di il reschissur Berthold Derungs. El maina suenter il 2019 per la segunda giada reschia a Sumvitg.
La gruppa da teater da Sumvitg sa cumpona da plirs giuvens acturs en cumbinaziun cun acturas ed acturs pli versads. Tge ch’haja fatg impressiun a Berthold Derungs, è era l’organisaziun dals requisits. El stueva sulet dir in giavisch e sin la proxim'emprova saja l’object giavischa gia stà organisà. Quai mussia che las commembras ed ils commembers veglian propi far tut per il success, betg sulet sin tribuna, accentuescha Berthold Derungs.
In toc pretensius ch’ins po rir
En il center dal toc stat in inventader che fa da tut las pussaivlas invenziuns che funcziuneschan alura sulet a mesas. Ma quella giada ha el inventà in roboter che duai far tut quai ch’ins giavischa e quel vegn alura preschentà a pussaivlas clientas e clients. Il toc è pretensius, cun lungs monologs nua ch’ins sto pronunziar bain ils pleds ed er betg discurrer memia svelt, di Berthold Derungs. Ma ins possia era rir tar quel toc ed las acturas ed ils acturs possian bain giugar durant las fasas senza text. Quai fetschia interessant il toc.
Era la mesemna sera vegn giugà teater a Sumvitg
Las producziun da teater a Sumvitg cumenzan cun la premiera da sonda sera, ils 16 da mars, e cun la producziun dals 17 da mars, la dumengia suentermezdi. Era vegn la gruppa a dar ina producziun la mesemna sera. Els hajan a Siat fatg fitg bunas experientscha cun ina producziun durant l’emna, di Berthold Derungs. Ed era las cifras actualas mussian che la mesemna saja propi ina alternativa da far ina producziun, di il reschissur ch’ha sez giugà bler teater en ses vitg patern Siat. Las davosas duas preschentaziuns vegnan lura ad esser il venderdi e la sonda che suonda.