Il bajetg nov duai vegnir construì sur la cafetaria. Sin trais etaschas èn previssas quatter chombras cun letgs singuls, duscha e tualetta. Plinavant duai dar plazs per s’entupar. Uschè vegnan las 8 chombras cun letgs dubels reducidas a trais.
Era en il bajetg existent vegnan chombras dublas midadas en singulas. Plinavant vegni bajegià in segund ascensur e la cafetaria vegn sanada.
23 chombras singulas e 3 chombras dublas
Cur ch’il project è realisà datti 23 chombras singulas e trais chombras dublas. Il dumber da letgs en la chasa Sogn Giusep resta dentant enavant tar 29 letgs (quels ha il Chantun lubì).
Dapli sfera privata
Il motiv, ch’ins mida da chombras dublas en singulas saja surtut ch’ils cussedents e confamigliars giavischian questa schliaziun per ch’ina persuna haja ina sfera privata. Vitiers vegn, che bleras chombras n'hajan betg duscha e tualetta, di il president da la cumissiun da bajegiar Lucas Tuor.
Nagins problems per ils cussedents
Sche tut va sco previs possian els cumenzar a bajegiar la primavaira 2018. Per ils cussedents na dettia quai nagins problems e nagin stoppia ir davent. Anzi, forsa saja quai schizunt interessant per els da vesair co quai vegn construì e quai dettia in pau recreaziun, manegia Lucas Tuor.
Cun la construcziun nova pudess ins era dar dimora temporara a giasts da vacanzas, per giasts dal di ubain a cussedents durant la fin d’emna per distgargiar ils parents da questa lavur.
Chantun dat 600'000 francs
Il chantun vul era gidar a finanziar il project cun conceder 600’000 francs. Il rest vegn finanzià cun ina ipoteca da 2’000’000 francs ed il chapital agen da 800’000 francs.
Ils tschintg onns passads ha la chasa Sogn Giusep purschì 30 plazzas cumplainas ed en media han 55 enfin 60 persunas indigenas chattà lavur en questa chasa, scriva la gasetta locala «Las Squadras» en sia ediziun nova.
La radunanza communala da Sumvitg decida ils 20 da zercladur sur dal credit da 600'000 francs.
RR actualitad 17:20