Siglir tar il cuntegn

Header

audio
La revisiun da la planisaziun locala a Sumvitg
Or da Actualitad dals 14.11.2022. Bild: RTR
laschar ir. Durada: 3 minutas 45 Secundas.
cuntegn

Sumvitg La sfida da reducir las parcellas da construcziun

Il mars 2013 ha la populaziun svizra acceptà cun gronda maioritad la lescha davart la planisaziun dal territori, per las bleras vischnancas munta quai ina reducziun da las zonas da construcziun – ina gronda sfida.

La gronda part da las vischnancas grischunas han memia bleras zonas da construcziun. Per ademplir la Lescha federala davart la planisaziun dal territori, vali da reducir las zonas e da las concentrar en ils centers dals vitgs. Quai è ina gronda sfida per tut las vischnancas pertutgadas. La vischnanca da Sumvitg ha perquai envidà ad ina saira d’orientaziun nua che las finamiras èn vegnidas preschentadas.

Il plan directiv communal vala

La vischnanca da Sumvitg è dapi blers onns vi da la revisiun da la planisaziun locala. La versiun actuala da la planisaziun locala datescha dal 1998. Perquai saja nairas uras da reveder la planisaziun, per regla vegnia fatga la planisaziun per 15 onns, declera il president da vischnanca da Sumvitg Patrick Schaniel. Era las midadas actualas da las zonas da construcziun vegnian fatgas per 15 onns, ed en l’avegnir vegnian ins a far pli savens revisiuns da la planisaziun, surtut sch’ins vesia ch'il terren da construcziun vegnia stgars, di Schaniel. Ma dezonar fetschia mal al singul possessur, quai saja era la vischnanca conscienta. En il plan directiv communal approvà il zercladur 2021 sajan las zonas actualas vegnidas mussadas, er ils pussaivels svilups e quai saja liant per la vischnanca, han declerà ils responsabels.

Boom da construcziun actual

Il mument regia in boom da construcziun en vischnanca. Uschia vegnan construidas sulet en il vischinadi da Rabius il mument almain tschintg chasas novas. Mintga lubientscha da construcziun ch’els possian dar, muntia per els ina parcella pli pauc da dezonar, pertge cun ina lubientscha sin maisa valia la parcella sco surbajegiada. Probabel vegnia suenter il termin per il chantun ditg nagin pli a bajegiar en vischnanca, ma il mument saja quai propi in legraivel svilup. Quai na muntia era betg ch’els stoppian dezonar autras parcellas, perquai possia er anc mintgin inoltrar ses project fin il mars, pli tard vegnia quai alura pli difficil, e da surbajegiar sajan quellas parcellas entaifer 3 onns, lura vegnian probablamain las respostas dal chantun.

In plaz da construcziun liber per 100 abitants

Ina da las reglas ch’il chantun dat avant è che la vischnanca po avair in plaz da construcziun liber per mintga 100 abitants. Per Sumvitg muntass quai sin radund 1’100 abitants anc 11 plazzas libras da construcziun. Dentant vegnian els betg a reducir talmain lur surfatscha, en in'emprima fasa vegnian els ad inoltrar ina proposta cun dapli plazzas da construcziun al chantun, ha ditg Patrick Schaniel. Perquai vegnian els segiramain a stuair surlavurar lur proposta, ma quai fetschian tuttas vischnancas. L’Uffizi da la planisaziun dal territori vegnia ad avair blera lavur ils proxims onns, di Schaniel. Il medem vala probablamain er per las dretgiras.

RTR actualitad 17:00

Artitgels legids il pli savens

Scrollar a sanestra Scrollar a dretga