Er las mesiraziuns han confermà ch’il mir è stà en moviment. La finala ha la suprastanza communala da Sumvitg decidì da sanar il lieu – e la radunanza communala ha concedì in credit brut da 960’000 per sanar il mir. Dus inschigners, Giachen Blumenthal e Walter Deplazes, èn vegnids incumbensads da planisar e survegliar las lavurs.
Ancras da fin 17 meters fin sut la baselgia en
En etappas vegn sanà il mir sin ina lunghezza da 16 meters. Suenter ch’il mir vegl è davent, vegni sprizzà betun encunter il terren. Quest betun vegn fixà cun ancras da 6 meters.
Sin quel vegn ina serra, ina paraid cun ancras da fin 17 meters, che van per part sut la baselgia en. Quellas duain tegnair il stgavament, sco che l’inschigner Walter Deplazes declera.
Crappa dal mir vegl embellescha il mir nov
Sco ultim vegn bajegià in mir da betun che è 14,3 meters aut e giudim 3,3 meters lad (il pe è alura 4,6 meters). Per resguardar l’estetica vegn quest mir da betun curclà cun la crappa dal mir vegl.
Durant las lavurs vegn mesirà, sch’il mir fiss en moviment ubain sche las ancras na tegnessan pli, di Walter Deplazes. Impurtant saja ch’il mir è stabil suenter la sanaziun e che quai na dettia pli sfendaglias e crappa che sa distatga.
Sche tut va tenor plan vegnan a cuzzar las lavurs – cun ina pausa dad in mais – fin almain mez november.
RR actualitad 11:15