Siglir tar il cuntegn

Header

video
Nova vita en la «Chasa Lechmann» a Sumvitg
Or da sil punct dals 20.07.2021.
laschar ir
cuntegn

Sumvitg Nova vita en la chasa Lechmann

Blers onns è la chasa Lechmann a Sumvitg gia vida. Ma l’istorgia da la chasa cun ustaria e sala da teater è d’impurtanza. Quella impurtanza vul la possessura nova Flurina Cahannes puspè carmalar enavos en questa chasa. Sco emprim duai dar ina exposiziun d’art. Ma suenter è tut anc avert.

Enturn l’entschatta dal davos tschientaner ha la famiglia Lechmann laschà construir ina segunda chasa vid l’existenta che deva gia plaz ad ina ustaria. Uschia è la sala da teater vegnida construida. Ina sala da lain e cun in artg che dat la pussaivladad a tuts da guardar sin la tribuna. Sin quella èn anc las culissas originalas da vesair. L’entira chasa sco era la sala da teater èn anc oz quasi tuttina sco avant 100 onns. Quai saja stà in dals motivs, daco che Flurina Cahannes ha cumprà la chasa. Sco giuvna architecta saja ella stada a la tschertga d’ina tala chasa veglia originala. E quai duai era restar suenter la renovaziun.

audio
Chasa Lechmann a Sumvitg daventa chasa d'art
03:59 min, Actualitad dals 20.07.2021.
laschar ir. Durada: 03:59 minutas.

Forsa datti abitaziuns per famiglias

Tge far cun ina tala chasa veglia, è ina da las dumondas centralas per Flurina Cahannes, che ha in biro d’architectura a Siat, ma ch’è creschida si a Turitg. Segir saja, che quai vegnia a dar ina cumbinaziun da spazi public e d’auter niz. Uschia pudess quai era dar abitaziuns per famiglias, pertge vita gliez saja quai ch’ella veglia puspè en chasa. Ed ina part duai star accessibla per il public, per exempel saja ina idea che la sala da teater pudess vegnir affittada per occurrenzas u festas da famiglia. Ma qua sajan ins anc a l’entschatta, di Flurina Cahannes. Ina ustaria sco antruras na vegnia quai probabel betg pli a dar.

Fin d’emna cun bler art e discussiun

La fin d’emna dals 21 e 22 d’avust vegni a dar pliras inscenaziuns artisticas en la chasa Lechmann. Tuttas sajan quasi vegnidas concepidas sulet per questa fin d’emna, di Natalia Huser ina da las curaturas dasper Vera Ida Müller. Impurtant saja che la chasa stettia en il center. Uschia saja pussaivel da prender invista da la chasa ed il medem mument era contemplar las inscenaziuns. Dasper tut quai vegni era fatg musica, tranter auter cun la Triada, il trio musical da Corin Curschellas, Ursina Giger ed Astrid Alexandre. Impurtant saja da s’annunziar, di Flurina Cahannes. L’occurrenza saja gratuita ed averta per tuts.

Il program è da vesair sin la pagina imaginaziun.ch, il link avra en ina nova fanestra. Quai la pagina da l’uniun ch’è quasi vegnida fundada sulet per quest event, e che ha sco finamira da dar novas perspectivas a la chasa e da reactivar ella. Uschia è la dumengia era planisà in podium da discussiun, tranter auter cun l’architect Peter Zumthor.

RTR actualitad 11:00

Artitgels legids il pli savens

Scrollar a sanestra Scrollar a dretga