Venderdi saira èn il premi grischun da cultura 2021 ed ils 11 premis da renconuschientscha e da promoziun vegnids surdads. Quai en halla da la chasa da scola a Sumvitg.
Istorgias captivantas e plain fantasia
Il scriptur da Sumvitg enritgeschia la litteratura cun istorgias captivantas e plain fantasia e dettia in maletg multifar da la Surselva. Tgi che legia ovras da Leo Tuor survegnia in maletg multifar da la Surselva e da la vita en territoris alpins, argumentescha la regenza.
La trilogia sursilvana furma sia ovra principala: Giacumbert Nau (1988), Onna Maria Tumera (2002) e Settembrini (2006).
L'um da 62 onns ha studegià filosofia, istorgia e litteratura e quai a Turitg, Friburg ed Berlin. Tuttina haja el passentà bleras stads sco nurser sin la Greina e l'atun sco chatschader si Carpet.
Il premi grischun da cultura è dotà cun 30'000 francs.
In premi spezial
I saja in premi spezial dal chantun Grischun, da la patria, di Leo Tuor.
Il bia surevgn ins ils premis ordaifer la patria, e suenter in temp vegn la patria alura era anc.
Ma malgrà quest premi na laschà en betg metter sesez sut squitsch. El na possia lavurar sut squitsch. Ed alla damonda, sch'el scrivia enavant, di el ch'el na sappia betg. Sch'i vegnia insatge scrivan ins, sch'i vegnia nagut restia il fegl vits.
La laudatio per Leo Tuor ha il schurnalist lucernais e criticher da litteratura Roman Bucheli fatg. El appreziescha il scribent che stat en Val Sumvitg sco grond raquintader e grond poet.
I reussescha ad el da raquintar ord la regiun cun in linguatg che è quel da la litteratura mundiala.
Ina da la pli bellas ed era pli trestas construcziun da Leo Tuor saja en Giacumbert Nau (1988): El aveva pli gugent ils teirs che ils carstgauns. Quest cudesch ha impressiunà Roman Bucheli. I saja in cudesch che haja da far fitg bler cun la cuntrada, ma che haja era da far cun ina figura che represchenta insatge essenzial da la vita humana.
Ulteriurs premis
Dasper il premi principal ha la regenza era surdà sis premis da renconuschientscha e tschintg premis da promoziun. Quels èn dotads mintgamai cun 20'000 francs.
Premis da renconuschientscha 2021:
- Mara Capelli, 1967, sautunza, Roveredo
- Ralph Feiner, 1961, fotograf, Malans
- Vera Kappeler, 1974, musicista e Peter Conradin Zumthor, musicist, 1979, Haldenstein
- Jürg Schmid, 1957, perscrutader d'insects, Glion
- Uniun e fundaziun Valendau Impuls, 2004, Valendau
- Curò Mani, 1949, musicist, Ardez
Premis da promoziun 2021:
- Chiara Balsarini, 1985, reschissura ed actura, Brusio
- Andriu Deplazes, 1993, artist, Sagogn, Brüssel e Marsiglia
- Sara - Bigna Janett, 1990, musicista, Tschlin/Turitg
- Valentina Minnig, 1991, artista, Cuira/Turitg
- Gian Stecher, 1983, musicist, Domat