Ina da las mesiras gia instradadas saja ch'ins veglia meglierar la communicaziun communala. Qua dettia potenzial da communitgar pli modern, uschia il president communal Patrick Schaniel. Plinavant ha la vischnanca gia instradà in process da digitalisar tut ils process administrativs communals ed uschia simplifitgar la lavur da las collavuraturas ed ils collavuraturs.
Promover la producziun d’energia
In'ulteriura finamira è da promover la producziun d’energia a Sumvitg. Gia instradada ed approvada è vegnida in'ovra idraulica a Rabius, ma era la producziun d’energia solara duai vegnir promovida. Uschia duai per exempel vegnir examinada la pussaivladad da realisar ina gronda ovra fotovoltaica a Crap Ner. In project concret na datti anc betg. Ins veglia simplamain sclerir il potenzial da quel lieu.
Plinavant veglian ins promover installaziuns fotovoltaicas pli pitschnas sin tetgs chasa ubain fatschadas. Er il spargnar energia duai vegnir promovì.
Chasa da persunal a Rabius
Er il spazi d'abitar duai vegnir promovì. Actualmain sajan ins vid realisar l’entira planisaziun locala e tschertas parcellas stoppian vegnir exzonadas en il rom da la relisaziun da la lescha federala.
Proò sch’in project è gia avant maun, na ston las parcellas betg vegnir exzonadas, ha declerà Patrick Schaniel. Quai valia per exempel a Rabius, nua ch'ina parcella duai vegnir cumprada da la vischnanca per realisar in project d’abitaziuns per persunal. La zona correspundenta saja gia midada – in novum en il Grischun. Uss dovri anc investiders per realisar il project. Quels duain, sche pussaivel, vegnir or da la vischnanca. L’idea è da fundar ina societad cooperativa che survegn il dretg da construcziun per la parcella e che realisescha lura las abitaziuns.
Anc dapli ideas e propostas
Atgnamain avessan els era pudì prender bler dapli mesiras e finamiras, manegia Patrick Schaniel. Propostas ed ideas avessi dà avunda. Ins na veglia dentant betg memia bleras finamiras, uschia ch'ins po sa concentrar pli fitg sin la realisaziun, ha accentuà il president communal.
