Sur la vischnanca da Sumvitg ha in fieu destruì cumplettamain in mises la notg da sonda sin dumengia. Duas persunas han stuì vegnir transportadas en l'ospital cun ina tissientada da fim supponida. L'alarm, ch'il mises a Salvaplauna Sut ardia saja arrivà la notg d'in quart avant l'ina, scriva la Polizia chantunala. Per vegnir tar il bajetg hajan ils pumpiers l'emprim stuì rumir la via ch'era cuverta cun plantas. Cura ch'ils 19 pumpiers da Sumvitg e Trun èn lura arrivads tar il mises brischava quel gia cumplettamain. Las duas persunas ch'han empruvà da stizzar il fieu hajan pudì bandunar sezzas il bajetg. La damaun a las quatter e mesa saja il fieu lura stà stizzà.
La raschun per l'incendi n'è anc betg enconuschenta, la Polizia chantunala ha cumenzà cun investigaziuns.