En tschintg stauschan ils scolars e scolaras dal stgalim superiur da Glion in grond char tras la citad. Oz è il di da rimnar palpiri vegl – intgins van cun charrettas, auters cun vaguns pli gronds ed anc ina giada auters portan il palpiri a maun.
Il palpiri vegl vegn rimnà en in container en l'areal d'industria vegl a l'ur da Glion. La gruppa cun il vagun grond suonda la via principala e passa sper stizuns ed abitaziuns. Igl è miaivel, ils blers han mongias curtas. I dà adina pli pauc palpiri vegl, cunquai che quints e gasettas èn adina pli savens digitalas.
Han ils giuvenils gia ina giada chattà insatge tranter il palpiri vegl ch'els han lura prendì a chasa? Alea, ina gronda scolara cun chavels lungs, raquinta, che sia collega haja chattà bons da McDonald's.
In'amia da mai ha chattà ina giada bons da McDonald's! Quels avain nus lura pudì retrair.
Cura ch'il char è l'emprima giada plain e ch'els derschan las tastgas ed ils satgs en il container, na chattan els betg mo palpiri. Quai che blers chattan è plastic – ma quai na fa nagin plaschair ad els. Ils giuvenils ston piclar ora tut il plastic tranter las plunas da palpiri vegl. Purtar enturn tut il palpiri dat chaud, er ils ultims tiran or lur giacca u pullover.
Las scolaras ed ils scolars n'èn dentant betg sulets durant rimnar palpiri, els survegnan sustegn dals scolasts e da las scolastas, tranter auter era da lur magister da classa Arno Capaul.
Il pli spectacular era, cura che jau sun stà en l'emprima u segunda classa, avain vis in «Bravo» – insatge che nus n'avevan anc mai vis avant.
Era el e sias collegas han sco uffants ramassà ina giada palpiri, sco els raquintan. Auter che las scolaras ed ils scolars, han els chattà a sias uras anc autras chaussas tranter il palpiri che mo plastic.
Il char è puspè vid, la gruppa va sin ina segunda runda tras il vitg. Suenter bunamain duas uras è l'entir palpiri vegl vegnì rimnà e deponì en il container. Per ils giuvenils èsi ussa l'emprim ina giada temp per far ina pausa meritada.