La vischnanca da Sursaissa po actualisar ses sistems d'informatica da l'administraziun communala. La radunanza communala da gievgia saira ha approvà unanimamain il credit necessari da 250'000 francs.
Ils sistems d'informatica en l'administraziun sajan vegls e duain uschia vegnir remplazzads cun la soluziun d'Axians Informa Svizra che porschian pussaivladads pli modernas d'ozendi.
Dus credits per il provediment d'aua da baiver
Plinavant han ils da Sursaissa approvà in credit da 390'000 francs per construir da nov il reservuar Bleika.
Il reservuar na correspundia betg pli a las prescripziuns actualas per il provediment d'aua da baiver. Quai è era gia vegnì reclamà da l'inspecturat da victualias. Ina sanaziun dal reservuar, construì l'onn 1986 na fetschia nagin senn. Il reservuar duai vegnir construì da nov var 100 meters al sid da la via Zavragia.
Ultra da quai ha la radunanza communala approvà in credit da 247'000 francs per remplazzar ils tumbins da reducziun da pressiun Vorderalp – Son Martin. Quels dad oz na correspundian betg pli a las prescripziuns actualas per il provediment d'aua.
