Avant 15 onns aveva la vischnanca da Sursaissa stgaffì las premissas da pudair bajegiar in hotel cun in center da sanadad ed in forum da cultura a Miraniga. Quai cun crear ina zona d'hotel, sanadad e cultura ch'aveva ina scadenza da 10 onns. Curt avant che quels 10 onns èn scadids ha la radunanza communala decidì il zercladur 2020 in'ulteriura revisiun parziala cun, tranter auter, ina nova scadenza da tschintg onns. Quella revisiun aveva il chantun lura approvà.
Encunter questa decisiun ha la Protecziun da la patria fatg il settember 2021 recurs tar la Dretgira administrativa dal chantun Grischun. La dretgira ha ussa renvià il recurs. La decisiun latiers ha ella publitgà glindesdi ils 8 da matg.
Ludmila Seifert da la Protecziun da la patria ha ditg envers RTR ch'ins acceptia la decisiun e na vegnia betg a trair vinavant quella.
