Siglir tar il cuntegn

Header

29 expositurs èn il 21 da november cun lur rauba a la fiera da Nadal a Sedrun.
Legenda: 29 expositurs èn il 21 da november cun lur rauba a la fiera da Nadal a Sedrun (maletg da simbol). Keystone
cuntegn

Surselva Sursassiala: Fiera da Nadal be en in lieu

Las Uniuns da dunnas da Tujetsch, Medel e Mustér èn sa cunvegnidas da far alternant la fiera da Nadal.

Dapli expositurs e dapli visitaders quai vulan las Uniuns da dunnas da Tujetsch, Medel e Mustér. Perquai èn ellas sa decididas d’organisar las fieras da Nadal alternantamain. Uschia na fan las singulas fieras nagina concurrenza ina a l’autra. Tenor Alice Deplazes da l’Uniun da dunnas da Tujetsch ch’organiseschan quest onn la fiera, han ins gia l’emprim success. «Igl ha dà quest onn in nov record, nus n’avain anc mai gì tants expositurs». Ils ultims onns hajan ins adina gì 18 fin 20 expositurs. L’augment saja d’engraziar ad expositurs che vegnian da Mustér, Medel mo era dal Tessin.

Nus stuain cumenzar a lavurar ensemen

Perquai che las vischnancas da Tujetsch e Mustér èn sco chaun e giat èn las reacziun stadas programmadas cura ch’igl è stà enconuschent che l’exposiziun saja quest onn sulet a Sedrun. Sco Alice Deplazes di haja quai dà expositurs che hajan ditg ch’els na vegnian segir betg a Sedrun cun in stan e quai saja lura probabel era il cuntrari il cas. Mo gist qua vulan las uniuns da dunnas dar in signal. «Sche nus na prendain ussa betg l'iniziativa e lavurain in cun l'auter, sche na funcziunescha quai mai», declera Alice Deplazes. Las uniuns da dunnas fetschian ussa ina giada l’emprim pass e speran ch’era autras uniuns suondian e collavureschian en il futur.

Fiera da Nadal 2015

La fiera da Nadal è sonda, ils 21 da november 2015 sin plaz scola a Sedrun. Ella cumenza las 14.00 e dura fin las 20.00. Sper l’exposiziun datti ina stiva da café ed in chantun da zambregiar per ils uffants.

Dapli da Surselvaavrir la Landingpage

Nach links scrollen Nach rechts scrollen