Record
Ils giuvenils derivan da la Svizra, Germania, Austria, Italia ed Ungaria. Ensemen cun persunas accumpagnantas sa tracta quai da ca. 300 giuvnas e giuvens da 13 -20 onns che derivan da la Svizra, Germania, Austria, Italia ed Ungaria. Quai saja in record da participants, perquai che fin uss s’inscuntravan tranter 60 ed 80 giuvenils, di il scolast e president dal comité d’organisaziun Kilian Grütter.
Tgirar contacts e spiritualitad benedictina
La finamira saja d’ina vart da tgirar ils contacts e da l’autra vart da intermediar insatge sur da la spiritualitad benedictina sin la via da furmaziun dals scolars. Perquai saja il motto da quest inscunter: “Scuvrir cristals e far traglischar els”, in motto che giaja bain a prà cun la regla da Son Benedetg, declera il frater Paul Tobler. Ils giuvenils pon lura er tschertgar cristals, lavar aur ubain far in’excursiun fin a la tgina dal Rain.
Il frater Paul era stà 2013 a l’inscunter da scolars benedictins en Germania. Là saja naschida l’idea d’organisar il proxim inscunter a Mustér.