Ils maletgs d'Alois Carigiet sa chattan en ina chasa en il center da la citad veglia da Glion. En ina stanza al plaun terren, oz ina part da la boutique da moda «Boutique Q:?», ha el decorà las preraids cun differents maletgs e motivs. Creà quels maletgs ha Alois Carigiet l’onn 1939, sco ina signatura sut in dals maletgs tradescha. Tenor il possessur da la chasa Hans Lutta, vegnivan quellas localitads duvradas da lez temp dal militar.
-
Bild 1 von 6. Hans Lutta declera in dals maletgs d'Alois Carigiet. Bildquelle: RTR, C. Albin.
-
Bild 2 von 6. Alois Carigiet ha creà ils maletgs l'onn 1939. Bildquelle: RTR, C. Albin.
-
Bild 3 von 6. Era ina vasa cun flurs è malegiada vid la paraid. Bildquelle: RTR, C. Albin.
-
Bild 4 von 6. In maletg mussa las trais lias dal Grischun. Bildquelle: RTR, C. Albin.
-
Bild 5 von 6. Sulet in cot disturba ils siemis da la schuldada. Bildquelle: RTR, C. Albin.
-
Bild 6 von 6. Renate Czerny, la possessura da la boutique (san.), e Hans Lutta (dre.). Bildquelle: RTR, C. Albin.
Difficil da mantegnair
Ils maletgs èn malegiads direct sin il mir da crap plitost umid, quai ch'è problematic per conservar la colur. Prender davent insaco ils maletgs da la paraid e dischlocar els en in lieu pli adattà na saja betg pussibel.
La segunda e davosa restauraziun è gist ida a fin. L'emprima restauraziun dals maletgs è succedida avant circa 30 onns. Cun sientar ils mirs spera Hans Lutta uss, ch'ils maletgs tegnian pli ditg. Ils maletgs d'Alois Carigiet en la chasa Lutta pon vegnir admirads durant il temp che la boutique da moda è averta.