Dapi in onn è Andri Tomaschett emprendist da ferrer d'armas e quai a Trun. El è il sulet en il Grischun. Blers onns è el sta en il cader naziunal da tiradurs ed ha fatg part a concurrenzas naziunalas ed internaziunalas. Sajettar quai plascha ad el. Er la chatscha enconuscha el da pitschen ensi ed el è in passiunà chatschader.
Suenter ses emprim emprendissadi da scrinari ha el vulì far ord ses hobi il mastergn. Cun esser ferrer d'armas fineschia la lavur insaco mai. U detg auter: il hobi accumpogna el durant l'entir di.
Per il mument è bler da far en fatschenta. Reparaturas da buis da chatscha che turnan ussa en fatschenta. Il temp suenter la chatscha è quasi stagiun auta per las fatschentas d'armas en il Grischun.
In sulet punct negativ dettia per el – sco ferrer d'armas èsi grev dad ir sez a chatscha durant il mais da settember. En quest cas ha el dentant chattà ina buna soluziun cun ses patrun Tino della Valle. Lez enconuscheva numnadamain quest «problem».
RR actualitad 08:00