La suprastanza communala da Mustér vul proponer da sustegnair las pendicularas da Mustér suenter il nausch start en la stagiun d'enviern. Quai scriva l'agentura da novitads ANR.
3 milliuns per indrizs d'ennavar
Tranter auter propona la suprastanza da sustegnair cun trais milliuns francs novs indrizs d'ennavar. La situaziun actuala mussia che la naiv na saja betg garantida en il territori da Mustér, malgrà ch'il territori tanschia enfin sin 3000 meters sur mar.
Sanar rempar dal Rein d'Acletta
Plinavant duai la vischnanca surpigliar tut ils custs per la sanaziun dal rempar dal Rein d'Acletta. La suprastanza è dal maini che las pendicularas na duain betg stuair sa participar a quests custs.
Emprest da 2,5 milliuns e garanzia d'emprest
In terz punct che la suprastanza propona è in emprest da 2,5 milliuns francs per la pendiculara da Sedrun a Parlets. Per quests daners duain las pendicularas pajar tschains. Ultra da quai duai la vischnanca surpigliar ina garanzia per in emprest dal chantun. Las pendicularas vegnan proximamain ad inoltrar a la vischnanca ina dumonda uffiziala per quest sustegn.
RR novitads 20:00