La stad 2016 è crudada fin ussa pulitamain en l’aua. Quasi en tut las regiuns da la Svizra hai gia uss dà dapli plievgia che durant l’entira stad 2015. Dapi la sonda vargada dominescha dentant il sulegl il tschiel sur la Svizra. Enfin gievgia fai aura da stad en l’entira Svizra, ed uschia era en il Grischun. Blers purs han spetgà daditg sin da quest’aura stabila.
Ora cun la fautsch u megler ditg il «Mähtrac»*
Tschiel blau, sulegl e temperaturas da stad - l’aura optimala per ils purs da far fain. Uschia ch’ins vesa sin plauncas e planiras actualmain ina massa purs vi da la lavur. Quai vala era per la famiglia Cathomen a Breil en Surselva. RTR accumpogna Gaudenz ed Anita Cathomen durant l’entir di ch’els fan fain.
Suenter 12-15 uras da lavur sin il prà, spetga anc lavur en stalla e a chasa.
Lungs dis da lavur, fitg lungs
Fin 15 uras è il pur Gaudenz Cathomen durant quests dis vi da segar e far fain sur Breil. Ma, i saja ina lavur che fetschia plaschair, uschia che tut na saja betg uschè nausch. Els sajan plinavant in team che enconuschia in l’auter – mintgin sappia tgi che fetschia tge. «Ma cler, cunquai che la stad è stada ditg bletscha e fraida, èsi uss da dar spezialmain gas», di Gaudenz Cathomen. Perquai sa gida perfin ses bab di per di sin las plauncas taissas sur Breil.
Jau gid memia gugent per pussar.
Plain engaschi – era cun 83 onns!
Ludivic Cathomen è il bab da Gaudenz Cathomen. El ha fatg durant sia entira vita il pur, ma era anc oz giauda el da gidar ses figl durant la stad – quai cun 83 onns. Tge che manca mai tar Ludivic Cathomen è la fautsch. Uras en ed uras o taglia el la plaunca cun la fautsch.
Avant paucas emnas ha Ludivic Cathomen gì in pitschen accident cun la fautsch. El è sa tagliads vid il maun. Uss è el dentant puspè èn acziun, malgrà ch’il medì ha cusseglià da far pausa. Ma, perquai sa gidia el memia gugent, di l’um da 83 onns.
Dar gas da far fain
-
Bild 1 von 6. La vista sur Breil davent dal prà da Gaudenz Cathomen. Bildquelle: RTR, Fabia Caduff.
-
Bild 2 von 6. Ludivic Cathomen. ha 83 onns e gida anc adina a far fain a ses figl. Bildquelle: RTR, Fabia Caduff.
-
Bild 3 von 6. Gaudenz Cathomen cun il tractur sin las costas stippas da Breil. Bildquelle: RTR, FABIA CADUFF.
-
Bild 4 von 6. Alois Cathomen. è en gir cun la fautsch moderna sin il prà tar temperaturas da bundant 30 grads. Bildquelle: RTR, Fabia Caduff.
-
Bild 5 von 6. La pli bell’aura èsi oz per far fain. Uschia sa raschlan las costas bler meglier. Bildquelle: RTR, FABIA CADUFF.
-
Bild 6 von 6. Reporter Gian Carlo Candinas live en il discurs cun Gaudenz Cathomen sur da far cun il fain. Bildquelle: RTR, FABIA CADUFF.
Il panorama da Breil
*Mähtrack ha per rumantsch dal reminent simplamain num «trac da segar» ;)
RR actualitad 08:00 +