-
Bild 1 von 2. Grazia a grascha e mistgel vegn il cubus anc a sa sbassar pli fitg en la terra. Bildquelle: RTR, Linus Livers .
-
Bild 2 von 2. Pius Truffer cun l'emprova simbolica da tener il cubus, che stat tut tort. Bildquelle: RTR, Linus Livers .
Avant 11 onns era vegnida construida l'emprima rundella en Surselva – e quai si Laax Murschetg. Entamez la rundella era vegnì tschentà in tarment cubus da betun e crap. Fin qua tut normal. Ma quels dis ha il crap cumenzà a sa mover, el cupitga – e sche quai va vinavant uschia ...
Mo nagina tema ...
In u l'auter sa regorda forsa ch'il cubus era vegnì concepì dals artists Wiedemann/Mettler. Ed els dus han planisà la cupitgada.
L'idea da laschar cupitgar il crap, u meglier ditg il cubus da betun surtratg cun crappa da Val, quella idea duai simbolisar la regiun enturn il crap da Flem cun la crudada da crappa dad avant 15'000 onns. Il sochel dal cubus è vegnì construì dad ina vart cun lenn e per far smarschir quel anc pli spert era perfin vegnì mess tranteren grascha e mistgel.
L' artista Pascal Wiedemann era surprendida ch'il cubus haja cumenzà pir uss a cupitgar. Tenor ella vegn el anc a sfundrar pli fitg en la terra. Pius Truffer, che ha montà quest cubus avant 11 onns, stima ch'el paisia 40-50 tonnas.
Ch'il cubus vegn a dar anc ina giada da discutar era previs: El duai la fin finala be mussar che tut è temporal.
RR actualitad 07:00