Per l’emprima giada va la Scola auta spezialisada dal Grischun ora en las regiuns. Communabel cun la regiun Surselva duai dar in spazi avert en favur d’in svilup persistent.
Sco la manadra dal departament per il svilup en il territori alpin, Ulrike Zika, ha orientà, veglian els cuntanscher cun la collavuraziun ina plivalur persistenta, tant sociala sco era economica ed ecologica. Era duai star en il center il barat da savida e d’experientschas.
«Surselva Lab»
La regiun Surselva haja in svilup regiunal fitg productiv ed ils contacts en la regiun sajan la finala stads decisivs per vegnir a Glion. I saja planisà da colliar la scienza cun la pratica e da procurar uschia per process da midaments pussaivels e per schanzas en la regiun e per la regiun. Per exempel veglian ins rinforzar l’economia regiunala cun sensibilisar la populaziun, era ciclus regiunals per exempel en l’agricultura ed en il forestalesser.
Tut las 15 vischnancas da la Surselva sa participeschian al partenadi cun la scola auta. Quai munta che la regiun e la scola auta portan communabel ils custs da 100'000 francs ad onn per la plazza a Glion – l’infrastructura per il biro finanziescha la regiun Surselva. Tenor il sviluppader regiunal da la Surselva Rudolf Büchi, vulan ins evaluar suenter trais onns il svilup dal «Surselva Lab» e suenter tschintg onns duai quel purtar sa sez finanzialmain.
«Economia circulara»
En il rom da la «Turnea grischuna» ed en connex cun l’avertura dal «Surselva Lab» ha la Scola auta spezialisada dal Grischun organisà ina discussiun al podium davart il svilup futur da la Surselva.
Il chavazzin è stà l'economia circulara. Quai vul dir: producir senza chaschunar rument e sche pussaivel duvrar il rument sco nova resursa per auters products.
«Löwenberg Surselva Impact Lab»
Dapi dus onns è mez vegn lavurà e planisà en l’anteriur chasti Löwenberg Schluein. L’iniziativa vegn da pliras persunas privatas ch’èn s’unidas tar ina uniun, ma era tar ina gruppa d'investiders che vul promover las interpresas giuvnas en plirs secturs. Economicamain, ma era finanzialmain e giuridicamain, saja quai reussì fitg bain ils ultims mais, uschia Ralf Schlaepfer president communal da Schluein e commember da la suprastanza dal «Surselva Impact Lab».
Il mument èn tschintg interpresas sa chasadas fix en il bajetg sur il vitg da Schluein. Ellas hajan surdà il bigliet d’entrada per il Löwenberg ad ulteriuras 30 interpresas. Quellas possian uss nizzegiar in onn gratuit tut l’infrastructura ed alura stoppian ellas pajar in tschains modest, uschia Schlaepfer.
Era cun la renovaziun dal chasti sajan els in pass enavant. Dus terzs sajan a la fin, u bunamain a la fin. Era ils studios vegnan anc a fin ed era ils spazis da lavurar independent. Cun lez veglian els la finala finanziar l’entir manaschi. Per finir las lavurs restantas dovran els anc radund dus milliuns francs.