Quella famiglia po far part dad in'acziun umanitara ch'il Cussegl federal ha decidì il mars 2015. Quell'acziun umanitara prevesa da prender si 3’000 persunas ch'èn spezialmain periclitadas, e quai cun ina procedura d'asil speziala. Els survegnan il status da fugitivs da la UNHCR, e quai gia en ils camps da fugitivs en il Libanon. Da là davent vegnan els directamain en Svizra.
Enstagl dad ir en in center per requirents d'asil en Svizra, èn els vegnids directamain tar l‘agid social ch'è da sia vart responsabel per l'integraziun da questa famiglia. Da quels 3’000 che pon far part da quell'acziun umanitara vegnan var 70 el Grischun, di Claudia Tomaschett, la manadra da l’uffizi social da la Surselva.
L’emprima famiglia ch'è directamain renconuschida sco fugitivs èn in bab, ina mamma e 3 uffants da la Siria. Dapi 4 onns èn els sin fugia, e dapi 8 dis èn els a Glion en claustra tar las mungias dominicanas. En claustra pon els restar fin che l’uffizi social ha sclerì tut las chaussas ch’i dovra. Ins quinta che quai dovria var 8 emnas.